pahle to zara sa haT ke dekha

pahle to zarā sā haT ke dekhā

us shoḳh se phir lipaT ke dekhā

itnī bhī burī na thī jo maiñ ne

duniyā ko zarā sā haT ke dekhā

dekhā use us kā ho ke aur phir

kyā farq paḌegā kaT ke dekhā

ham jam.a hue hī jā rahe the

ārām milā jo ghaT ke dekhā

bas ek hī ḳhvāb thā ki jis ko

tā-umr ulaT-palaT ke dekhā

vo aur qarīb aa gayā thā

jab maiñ ne zarā simaT ke dekhā

phir dil ne mire ġham aur ḳhushī ko

rassī kī tarah se baT ke dekhā

kal Duub rahā thā 'farhat-ehsās'

ham ne bhī tamāshā DaT ke dekhā

pahle to zara sa haT ke dekha

us shoKH se phir lipaT ke dekha

itni bhi buri na thi jo main ne

duniya ko zara sa haT ke dekha

dekha use us ka ho ke aur phir

kya farq paDega kaT ke dekha

hum jama hue hi ja rahe the

aaram mila jo ghaT ke dekha

bas ek hi KHwab tha ki jis ko

ta-umr ulaT-palaT ke dekha

wo aur qarib aa gaya tha

jab main ne zara simaT ke dekha

phir dil ne mere gham aur KHushi ko

rassi ki tarah se baT ke dekha

kal Dub raha tha 'farhat-ehsas'

hum ne bhi tamasha DaT ke dekha