pahli mohabbaton ke zamane guzar gae

pahlī mohabbatoñ ke zamāne guzar ga.e

sāhil pe ret chhoḌ ke dariyā utar ga.e

terī anā niyāz kī kirneñ bujhā ga.ī

jazbe jo dil meñ ubhre the sharminda kar ga.e

dil kī fazā.eñ aa ke kabhī ḳhud bhī dekh lo

tum ne jo daaġh baḳhshe the kyā kyā nikhar ga.e

tere badan kī lau meñ karishma numū kā thā

ġhunche jo terī sej pe jaage sañvar ga.e

sadiyoñ meñ chand phuul khile aur samar bane

lamhoñ meñ āñdhiyoñ ke thapeḌoñ se mar ga.e

shab bhar badan manāte rahe jashn-e-māhtāb

aa.ī sahar to jaise añdheroñ se bhar ga.e

mahfil meñ terī aa.e the lekar nazar kī pyaas

mahfil se terī le ke magar chashm-e-tar ga.e

qatre kī jur.atoñ ne sadaf se liyā ḳhirāj

dariyā samundaroñ meñ mile aur mar ga.e

pahli mohabbaton ke zamane guzar gae

sahil pe ret chhoD ke dariya utar gae

teri ana niyaz ki kirnen bujha gai

jazbe jo dil mein ubhre the sharminda kar gae

dil ki fazaen aa ke kabhi KHud bhi dekh lo

tum ne jo dagh baKHshe the kya kya nikhar gae

tere badan ki lau mein karishma numu ka tha

ghunche jo teri sej pe jage sanwar gae

sadiyon mein chand phul khile aur samar bane

lamhon mein aandhiyon ke thapeDon se mar gae

shab bhar badan manate rahe jashn-e-mahtab

aai sahar to jaise andheron se bhar gae

mahfil mein teri aae the lekar nazar ki pyas

mahfil se teri le ke magar chashm-e-tar gae

qatre ki juraton ne sadaf se liya KHiraj

dariya samundaron mein mile aur mar gae