pahlu mein baiTh kar wo pate kya

pahlū meñ baiTh kar vo paate kyā

dil to thā hī nahīñ churāte kyā

hijr meñ ġham bhī ek ne.amat hai

ye na hotā to aaj khāte kyā

murġh-e-dil hī kā kuchh rahā mazkūra

aur be-par kī vaañ uḌāte kyā

raah kī chheḌ-chhāḌ ḳhuub nahīñ

vo bigaḌtā to ham banāte kyā

sadma hāsil huā alam laa.e

aur kūche se us ke laate kyā

shaiḳh-jī kahte haiñ ġhinā ko harām

un se pūchho to haiñ ye gaate kyā

lāġhar hī se kafan meñ thā bhī maiñ

merī mayyat ko vo uThāte kyā

ḳhaak us kūche kī na lā rakhte

to 'saḳhī' qabr meñ bichhāte kyā

pahlu mein baiTh kar wo pate kya

dil to tha hi nahin churaate kya

hijr mein gham bhi ek neamat hai

ye na hota to aaj khate kya

murgh-e-dil hi ka kuchh raha mazkura

aur be-par ki wan uDate kya

rah ki chheD-chhaD KHub nahin

wo bigaDta to hum banate kya

sadma hasil hua alam lae

aur kuche se us ke late kya

shaiKH-ji kahte hain ghina ko haram

un se puchho to hain ye gate kya

laghar hi se kafan mein tha bhi main

meri mayyat ko wo uThate kya

KHak us kuche ki na la rakhte

to 'saKHi' qabr mein bichhate kya