pahlu mein rah gaya yun ye dil taDap taDap kar

pahlū meñ rah gayā yuuñ ye dil taḌap taḌap kar

rah jaa.e jaise koī bismil taḌap taḌap kar

majnūn-e-be-ḳhirad ne dī jaañ ba-nā-umīdī

lailā kā dekhte hī mahmil taḌap taḌap kar

kahiyo sabā jo jaave mazbūh-e-ġham ne tere

āsān kī shab apnī mushkil taḌap taḌap kar

us pardagī ne apnā āñchal nahīñ dikhāyā

mar mar ga.e haiñ us ke maa.il taḌap taḌap kar

qātil kā mere kūcha hai ḳhvāb-gāh-e-rāhat

kyā kyā na so rahe yaañ ghāyal taḌap taḌap kar

haal us ġharīq kā hai jā-e-tarahhum ai dil

rah jaa.e hai jo zer-e-sāhil taḌap taḌap kar

qaabū meñ aa.e par maiñ chhoḌā na us ko hargiz

bal khā ke garche niklā qātil taḌap taḌap kar

tū ne to aabrū hī kho dī hamārī ai dil

maqtal meñ āshiqoñ ke shāmil taḌap taḌap kar

jhumke dikhā ke us ko tū ne jo muñh dikhāyā

mar hī gayā na terā saa.il taḌap taḌap kar

go murġh-e-nāma-bar ko bismil kiyā hai us ne

tai kar rahegā āḳhir manzil taḌap taḌap kar

furqat meñ us kī tū ne ai 'mus.hafī' batā tū

juz-ashk-e-ḳhūñ kiyā kyā hāsil taḌap taḌap kar

mujh ko ye sūjhtā hai nāhaq tū jaan degā

ik din isī tarah se jāhil taḌap taḌap kar

pahlu mein rah gaya yun ye dil taDap taDap kar

rah jae jaise koi bismil taDap taDap kar

majnun-e-be-KHirad ne di jaan ba-na-umidi

laila ka dekhte hi mahmil taDap taDap kar

kahiyo saba jo jawe mazbuh-e-gham ne tere

aasan ki shab apni mushkil taDap taDap kar

us pardagi ne apna aanchal nahin dikhaya

mar mar gae hain us ke mail taDap taDap kar

qatil ka mere kucha hai KHwab-gah-e-rahat

kya kya na so rahe yan ghayal taDap taDap kar

haal us ghariq ka hai ja-e-tarahhum ai dil

rah jae hai jo zer-e-sahil taDap taDap kar

qabu mein aae par main chhoDa na us ko hargiz

bal kha ke garche nikla qatil taDap taDap kar

tu ne to aabru hi kho di hamari ai dil

maqtal mein aashiqon ke shamil taDap taDap kar

jhumke dikha ke us ko tu ne jo munh dikhaya

mar hi gaya na tera sail taDap taDap kar

go murgh-e-nama-bar ko bismil kiya hai us ne

tai kar rahega aaKHir manzil taDap taDap kar

furqat mein us ki tu ne ai 'mushafi' bata tu

juz-ashk-e-KHun kiya kya hasil taDap taDap kar

mujh ko ye sujhta hai nahaq tu jaan dega

ek din isi tarah se jahil taDap taDap kar