pahlu talash kar gham-e-jaanan nae nae

pahlū talāsh kar ġham-e-jānāñ na.e na.e

detā hai roz dard ke sāmāñ na.e na.e

ḳhushiyāñ na.ī na.ī sī haiñ armāñ na.e na.e

phir zindagī ko mil ga.e unvāñ na.e na.e

shah dil ko mil ga.ī hai phir un kī nigāh se

phir shauq DhūñDhtā hai dil-o-jāñ na.e na.e

phir mahv-e-intizār haiñ taaza qayāmateñ

phir bas rahe haiñ shahr-e-nigārāñ na.e na.e

phir dard kī fazā meñ safar hai ḳhayāl kā

phir vajd meñ haiñ dasht-o-bayābāñ na.e na.e

phir oḌh kar chalī hai havas ishq kī ridā

phir baḌh ga.e fareb ke imkāñ na.e na.e

ai 'shān' inqilāb-e-zamāna kī haiñ dalīl

ye uljhaneñ ye ḳhvāb-e-pareshāñ na.e na.e

pahlu talash kar gham-e-jaanan nae nae

deta hai roz dard ke saman nae nae

KHushiyan nai nai si hain arman nae nae

phir zindagi ko mil gae unwan nae nae

shah dil ko mil gai hai phir un ki nigah se

phir shauq DhunDhta hai dil-o-jaan nae nae

phir mahw-e-intizar hain taza qayamaten

phir bas rahe hain shahr-e-nigaran nae nae

phir dard ki faza mein safar hai KHayal ka

phir wajd mein hain dasht-o-bayaban nae nae

phir oDh kar chali hai hawas ishq ki rida

phir baDh gae fareb ke imkan nae nae

ai 'shan' inqilab-e-zamana ki hain dalil

ye uljhanen ye KHwab-e-pareshan nae nae