pahuncha hai uske pas ye aaina TuT ke

pahuñchā hai us ke paas ye ā.īna TuuT ke

kis se milā hai shīsha-e-dil ham se phuuT ke

husn-e-malīh kā na kiyā zaḳhmiyoñ ne shukr

ai kirdgār nikle namak phuuT phuuT ke

sar phoḌ kar mue jo tire sang-e-dar se ham

rah rah ga.e hasīn bhī māthoñ ko kuuT ke

be-nūr hone par bhī vahī josh-e-girya hai

āñkheñ hamārī aur bahīñ phuuT phuuT ke

ai rashk-e-māh raat ko muTThī na kholnā

mehñdī kā chor haath se jaa.e na chhūT ke

tadbīr zahr dene kī hai pā.emāloñ ko

hiire lagā.e jaate haiñ pannoñ meñ boot ke

dil le ke palkeñ phir ga.iiñ zulfoñ kī aaḌ meñ

ulTī phirī ye fauj sar-e-shām luuT ke

mauzūñ kareñge vasf dikhāo phaketiyāñ

jaane na paa.eñ haath se mazmūn chhūT ke

dete haiñ mere sāmne ġhairoñ ko ḳharpuze

bāġh-e-jahāñ meñ aap haiñ mushtāq phuuT ke

kañghī se zulf uljhī to dil TukḌe ho gayā

ā.īne meñ ye baal paḌe TuuT TuuT ke

raftār meñ na kyuuñ ho chamak raqs-e-nāz kī

zohra bhī hai sharīk sitāroñ meñ luuT ke

ai rashk-e-mah jo zohra-e-gardūñ kā bas chale

toḌe tumhāre naach ke le jaa.e luuT ke

naqd-e-hayāt-o-jāma-e-tan chhīntī hai kyuuñ

ai maut kyā karegī musāfir ko luuT ke

'ambar ke badle mushk hai mauj-e-ḳhirām meñ

zulfoñ ke baal mil ga.e fiite se luuT ke

afshāñ jo chhūTī aap ke māthe se raat ko

taare gire zamīn par ai maah TuuT ke

ro ro ke ruuh jism se kahtī hai vaqt-e-naz'

ai ghar mileñge dekhiye kab tujh se chhūT ke

mujh ko nahīñ pasand ye farmā.ish ai 'munīr'

kyuuñ jhuuT bāñdhūñ qāfiyoñ meñ TuuT phuuT ke

pahuncha hai us ke pas ye aaina TuT ke

kis se mila hai shisha-e-dil hum se phuT ke

husn-e-malih ka na kiya zaKHmiyon ne shukr

ai kirdgar nikle namak phuT phuT ke

sar phoD kar mue jo tere sang-e-dar se hum

rah rah gae hasin bhi mathon ko kuT ke

be-nur hone par bhi wahi josh-e-girya hai

aankhen hamari aur bahin phuT phuT ke

ai rashk-e-mah raat ko muTThi na kholna

mehndi ka chor hath se jae na chhuT ke

tadbir zahr dene ki hai paemalon ko

hire lagae jate hain pannon mein boot ke

dil le ke palken phir gain zulfon ki aaD mein

ulTi phiri ye fauj sar-e-sham luT ke

mauzun karenge wasf dikhao phaketiyan

jaane na paen hath se mazmun chhuT ke

dete hain mere samne ghairon ko KHarpuze

bagh-e-jahan mein aap hain mushtaq phuT ke

kanghi se zulf uljhi to dil TukDe ho gaya

aaine mein ye baal paDe TuT TuT ke

raftar mein na kyun ho chamak raqs-e-naz ki

zohra bhi hai sharik sitaron mein luT ke

ai rashk-e-mah jo zohra-e-gardun ka bas chale

toDe tumhaare nach ke le jae luT ke

naqd-e-hayat-o-jama-e-tan chhinti hai kyun

ai maut kya karegi musafir ko luT ke

'ambar ke badle mushk hai mauj-e-KHiram mein

zulfon ke baal mil gae fite se luT ke

afshan jo chhuTi aap ke mathe se raat ko

tare gire zamin par ai mah TuT ke

ro ro ke ruh jism se kahti hai waqt-e-naz'

ai ghar milenge dekhiye kab tujh se chhuT ke

mujh ko nahin pasand ye farmaish ai 'munir'

kyun jhuT bandhun qafiyon mein TuT phuT ke