paida hua ye habab kaisa

paidā huā ye habāb kaisā

dariyā meñ hai pech-o-tāb kaisā

ab fasl-e-junūñ kahāñ hai baaqī

phir dekh rahā huuñ ḳhvāb kaisā

thā dast-e-hunar meñ mom sā jo

pathrā gayā vo shabāb kaisā

sim-sim kī sadā pe khul rahā thā

thā halqa-e-dar-e-sarāb kaisā

ek ek varaq paḌhā huā sā

hai nusḳha-e-intiḳhāb kaisā

partav se tire vajūd merā

āġhosh meñ le hijāb kaisā

kyā jaane hamārī talḳh-kāmī

hai zā.iqa-e-sharāb kaisā

ḳhushbueñ tavāf kar rahī thiiñ

thā pichhle pahar ḳhitāb kaisā

qatra qatra chamak rahā hai

raushan huā zer-e-āb kaisā

maiñ apne ḳhilāf ho gayā huuñ

nāzil huā ye azaab kaisā

muddat se hai band qufl-e-abjad

ai muhtasibo hisāb kaisā

sab mauj-e-havā meñ rañg us ke

ai momino ijtināb kaisā

dīvār kā bojh baam par hai

ye ghar bhī huā ḳharāb kaisā

paida hua ye habab kaisa

dariya mein hai pech-o-tab kaisa

ab fasl-e-junun kahan hai baqi

phir dekh raha hun KHwab kaisa

tha dast-e-hunar mein mom sa jo

pathra gaya wo shabab kaisa

sim-sim ki sada pe khul raha tha

tha halqa-e-dar-e-sarab kaisa

ek ek waraq paDha hua sa

hai nusKHa-e-intiKHab kaisa

partaw se tere wajud mera

aaghosh mein le hijab kaisa

kya jaane hamari talKH-kaami

hai zaiqa-e-sharab kaisa

KHushbuen tawaf kar rahi thin

tha pichhle pahar KHitab kaisa

qatra qatra chamak raha hai

raushan hua zer-e-ab kaisa

main apne KHilaf ho gaya hun

nazil hua ye azab kaisa

muddat se hai band qufl-e-abjad

ai muhtasibo hisab kaisa

sab mauj-e-hawa mein rang us ke

ai momino ijtinab kaisa

diwar ka bojh baam par hai

ye ghar bhi hua KHarab kaisa