paiham udasiyon se bayaban hai zindagi

paiham udāsiyoñ se bayābāñ hai zindagī

dil meñ bahār ho to gulistāñ hai zindagī

ai intihā-e-kashmakash-e-shaiḳh-o-barhman

hindū hai zindagī na musalmāñ hai zindagī

be-chainiyoñ meñ ġharq hai sarmāya-e-hayāt

tābīr-hā-e-ḳhvāb-e-pareshāñ hai zindagī

hai maut iḳhtitām pareshāniyoñ kā naam

jab tak ye zindagī hai pareshāñ hai zindagī

ġhāfil nahīñ to kyuuñ nahīñ anjām par nazar

har lahza har-nafas jo gurezāñ hai zindagī

haiñ muḳhtalif fasāna-e-hastī kī surḳhiyāñ

pinhāñ kahīñ kahīñ pe numāyāñ hai zindagī

nazzāra-e-jamāl se ġhash huuñ maiñ ai 'safīr'

behosh mujh ko dekh ke hairāñ hai zindagī

paiham udasiyon se bayaban hai zindagi

dil mein bahaar ho to gulistan hai zindagi

ai intiha-e-kashmakash-e-shaiKH-o-barhman

hindu hai zindagi na musalman hai zindagi

be-chainiyon mein gharq hai sarmaya-e-hayat

tabir-ha-e-KHwab-e-pareshan hai zindagi

hai maut iKHtitam pareshaniyon ka nam

jab tak ye zindagi hai pareshan hai zindagi

ghafil nahin to kyun nahin anjam par nazar

har lahza har-nafas jo gurezan hai zindagi

hain muKHtalif fasana-e-hasti ki surKHiyan

pinhan kahin kahin pe numayan hai zindagi

nazzara-e-jamal se ghash hun main ai 'safir'

behosh mujh ko dekh ke hairan hai zindagi