paiman-e-wafa-e-yar hain hum

paimān-e-vafā-e-yār haiñ ham

yā'nī nā-pā.edār haiñ ham

ḳhāk-e-sar-e-rahguzār haiñ ham

pāmāl-e-jafā-e-yār haiñ ham

naumīdī o yaas chaar sū hai

uf kis ke umīd-vār haiñ ham

kis dushman-e-jāñ kī aarzū hai

jo maut ke ḳhvāst-gār haiñ ham

tū ham se hai bad-gumāñ sad afsos

tere hī to jāñ-nisār haiñ ham

'vahshat' ḳhāmosh jal rahe haiñ

goyā sham'-e-mazār haiñ ham

paiman-e-wafa-e-yar hain hum

ya'ni na-paedar hain hum

KHak-e-sar-e-rahguzar hain hum

pamal-e-jafa-e-yar hain hum

naumidi o yas chaar su hai

uf kis ke umid-war hain hum

kis dushman-e-jaan ki aarzu hai

jo maut ke KHwast-gar hain hum

tu hum se hai bad-guman sad afsos

tere hi to jaan-nisar hain hum

'wahshat' KHamosh jal rahe hain

goya sham'-e-mazar hain hum