palang kun chhoD Khaali god sin jab uTh gaya mita

palañg kuuñ chhoḌ ḳhālī god siiñ jab uTh gayā miitā

chitar-kārī lagī khāne haman kuuñ ghar huā chītā

banā.ī be-navā.ī kī juuñ tarah sab se chhuḌe ham niiñ

tujh auroñ ko liyā hai saath apne ik nahīñ miitā

sirat ke taar abjad ek sur ho mil ke sab bole

ki jis kuuñ gyaan hai us jaan kuuñ har taan hai giitā

judā.ī ke zamāne kī sajan kyā zyādtī kahiye

ki us zālim kī jo ham par ghaḌī guzrī so jug biitā

muqarrar jab ki jāñ-bāzoñ meñ us kā ho chukā marnā

huā tab is qadar ḳhush-dil goyā āshiq ne jag jiitā

lagā dil yaar siiñ tab us ko kyā kaam 'ābrū' setī

ki zaḳhmī ishq kā phir maañg kar paanī nahīñ piitā

palang kun chhoD KHali god sin jab uTh gaya mita

chitar-kari lagi khane haman kun ghar hua chita

banai be-nawai ki jun tarah sab se chhuDe hum nin

tujh auron ko liya hai sath apne ek nahin mita

sirat ke tar abjad ek sur ho mil ke sab bole

ki jis kun gyan hai us jaan kun har tan hai gita

judai ke zamane ki sajan kya zyaadti kahiye

ki us zalim ki jo hum par ghaDi guzri so jug bita

muqarrar jab ki jaan-bazon mein us ka ho chuka marna

hua tab is qadar KHush-dil goya aashiq ne jag jita

laga dil yar sin tab us ko kya kaam 'abru' seti

ki zaKHmi ishq ka phir mang kar pani nahin pita