palaT jaana koi mushkil nahin tha

palaT jaanā koī mushkil nahīñ thā

mirā hī vāpsī kā dil nahīñ thā

matā-e-zīst lā-hāsil nahīñ thā

vale paane ke maiñ qābil nahīñ thā

vo chhuriyāñ dhaar jis par ho rahīñ thiiñ

mirā hī dil thā koī sil nahīñ thā

khulā bāb-e-junūñ jab mujh pe yaaro

mirā tab koī mustaqbil nahīñ thā

marīz-e-ishq hone tak sunā hai

adhūrī zaat thā kāmil nahīñ thā

mujhe ġharqāb thā az-had zarūrī

vagarna ziist ke qābil nahīñ thā

maiñ pyāsā thā magar hoñToñ se mahrūm

samundar thā magar sāhil nahīñ thā

na do ilzām bhauñre ko 'alī' tum

vo hargiz phuul kā qātil nahīñ thā

palaT jaana koi mushkil nahin tha

mera hi wapsi ka dil nahin tha

mata-e-zist la-hasil nahin tha

wale pane ke main qabil nahin tha

wo chhuriyan dhaar jis par ho rahin thin

mera hi dil tha koi sil nahin tha

khula bab-e-junun jab mujh pe yaro

mera tab koi mustaqbil nahin tha

mariz-e-ishq hone tak suna hai

adhuri zat tha kaamil nahin tha

mujhe gharqab tha az-had zaruri

wagarna zist ke qabil nahin tha

main pyasa tha magar honTon se mahrum

samundar tha magar sahil nahin tha

na do ilzam bhaunre ko 'ali' tum

wo hargiz phul ka qatil nahin tha