palaT ke daur-e-zaman subh-o-sham paida kar

palaT ke daur-e-zamāñ sub.h-o-shām paidā kar

na.e tarīq se duniyā meñ naam paidā kar

tirā mazāq uḌāte haiñ dekhne vaale

agar nizām ġhalat ho nizām paidā kar

nazar ko tuur banā dil ko markaz-e-asrār

ġham-e-alast se aish-e-davām paidā kar

sukūn maut kī tamhīd hai zamāne meñ

lahū meñ harakat o soz-e-tamām paidā kar

nasīm-e-sub.h kī mānind muskurātā chal

guloñ kī tarah zamāna meñ naam paidā kar

falak bhī terī bulandī ko pā nahīñ saktā

havas ko chhoḌ ke lekin maqām paidā kar

amīn-e-husn jahāñ-tāb hai tirī hastī

jahāñ meñ puḳhtagī-e-ishq-e-ḳhām paidā kar

ḳhudā ke naam pe duniyā ko lūTne vaale

ḳhudī kā dil meñ zarā ehtimām paidā kar

adū bhī naaz uThā.e vo kaam kar 'shātir'

zamāna sar ko jhukā de vo naam paidā kar

palaT ke daur-e-zaman subh-o-sham paida kar

nae tariq se duniya mein nam paida kar

tera mazaq uDate hain dekhne wale

agar nizam ghalat ho nizam paida kar

nazar ko tur bana dil ko markaz-e-asrar

gham-e-alast se aish-e-dawam paida kar

sukun maut ki tamhid hai zamane mein

lahu mein harakat o soz-e-tamam paida kar

nasim-e-subh ki manind muskuraata chal

gulon ki tarah zamana mein nam paida kar

falak bhi teri bulandi ko pa nahin sakta

hawas ko chhoD ke lekin maqam paida kar

amin-e-husn jahan-tab hai teri hasti

jahan mein puKHtagi-e-ishq-e-KHam paida kar

KHuda ke nam pe duniya ko luTne wale

KHudi ka dil mein zara ehtimam paida kar

adu bhi naz uThae wo kaam kar 'shatir'

zamana sar ko jhuka de wo nam paida kar