palkon pe yahi KHwab sajaya hai ki tum ho

palkoñ pe yahī ḳhvāb sajāyā hai ki tum ho

ye sāmne mere koī tum sā hai ki tum ho

dastak sī huī jab bhī to darvāze ko maiñ ne

har baar yahī soch ke kholā hai ki tum ho

raunaq meñ achānak jo izāfa sā huā hai

āñgan meñ mire chāñd kā haala hai ki tum ho

hai talḳh haqīqat ki mujhe chhoḌ ga.e ho

ehsās magar ab bhī ye hotā hai ki tum ho

bedār the jab tak to muḳhātib the tumhīñ se

jab aañkh lagī ḳhvāb meñ dekhā hai ki tum ho

tum ruuh meñ utre ho pata ye nahīñ phir bhī

aamad kā har ik sher batātā hai ki tum ho

palkon pe yahi KHwab sajaya hai ki tum ho

ye samne mere koi tum sa hai ki tum ho

dastak si hui jab bhi to darwaze ko main ne

har bar yahi soch ke khola hai ki tum ho

raunaq mein achanak jo izafa sa hua hai

aangan mein mere chand ka haala hai ki tum ho

hai talKH haqiqat ki mujhe chhoD gae ho

ehsas magar ab bhi ye hota hai ki tum ho

bedar the jab tak to muKHatib the tumhin se

jab aankh lagi KHwab mein dekha hai ki tum ho

tum ruh mein utre ho pata ye nahin phir bhi

aamad ka har ek sher batata hai ki tum ho