pankhuDi koi gulistan se saba kya lai

pañkhuḌī koī gulistāñ se sabā kyā laa.ī

duur tak nik.hat-e-gul ḳhaak uḌātī aa.ī

uf vo begāna nigāhoñ kī karam-farmā.ī

fitrat-e-ishq ba-andāz-e-junūñ tharrā.ī

taaza taaza vo shikast-e-suḳhan-e-ra.anā.ī

chup hue vo to tabassum kī jhalak sī aa.ī

āḳhir-e-shab vo sitāroñ kī saraktī huī chhāñv

maiñ vahīñ baiTh gayā raat jahāñ lahrā.ī

jaagī jaagī huī palkeñ vo ba-āġhosh-e-jamāl

dil ko ārām ziyāda thā to kam niiñd aa.ī

vaqt ne zarf-e-nazar ko lab-e-mai-ḳhvār kiyā

tishnagī shīshe ko paimāna banā kar laa.ī

zindagī ek hujūm-e-guzarāñ hai lekin

aadmī apnī jagah ālam-e-sad-tanhā.ī

apne hī sho.la-e-rañgīñ se jalā dāman-e-gul

apnī hī shāḳh-e-tabassum pe kalī murjhā.ī

manzil-e-aql junūñ rañg use miltī hai

jis ne ik baar rah-e-ishq meñ Thokar khaa.ī

patte patte kā nahīñ gulshan-e-ālam meñ javāb

zarre zarre meñ dhaḌaktā hai dil-e-yaktā.ī

TūTtī sī rag-e-daurāñ ye taraqqī kī thakan

kisī ma.ashūq-e-sahar-ḳhez kī nīm-añgḌā.ī

ḳhaak aur ḳhuun se ik sham.a jalā.ī hai 'nushūr'

maut se ham ne bhī sīkhī hai hayāt-ārā.ī

pankhuDi koi gulistan se saba kya lai

dur tak nikhat-e-gul KHak uDati aai

uf wo begana nigahon ki karam-farmai

fitrat-e-ishq ba-andaz-e-junun tharrai

taza taza wo shikast-e-suKHan-e-ranai

chup hue wo to tabassum ki jhalak si aai

aaKHir-e-shab wo sitaron ki sarakti hui chhanw

main wahin baiTh gaya raat jahan lahrai

jagi jagi hui palken wo ba-aghosh-e-jamal

dil ko aaram ziyaada tha to kam nind aai

waqt ne zarf-e-nazar ko lab-e-mai-KHwar kiya

tishnagi shishe ko paimana bana kar lai

zindagi ek hujum-e-guzaran hai lekin

aadmi apni jagah aalam-e-sad-tanhai

apne hi shola-e-rangin se jala daman-e-gul

apni hi shaKH-e-tabassum pe kali murjhai

manzil-e-aql junun rang use milti hai

jis ne ek bar rah-e-ishq mein Thokar khai

patte patte ka nahin gulshan-e-alam mein jawab

zarre zarre mein dhaDakta hai dil-e-yaktai

TuTti si rag-e-dauran ye taraqqi ki thakan

kisi mashuq-e-sahar-KHez ki nim-angDai

KHak aur KHun se ek shama jalai hai 'nushur'

maut se hum ne bhi sikhi hai hayat-arai