parastish kar raha hai har jawan-o-pir patthar ki

parastish kar rahā hai har javān-o-pīr patthar kī

sanam-ḳhāne meñ aa kar jaag uThī taqdīr patthar kī

tasavvur ne but-e-kāfir kī dil meñ shakl khīñchī hai

tamāsha dekhiye shīshe meñ hai tasvīr patthar kī

tasavvur dil meñ ashk āñkhoñ meñ lab par mohr-e-ḳhāmoshī

banā baiThā huuñ un kī yaad meñ tasvīr patthar kī

adab se zāhid-e-kāba-nashīñ bhī chuum letā hai

tumhāre dar se lag kar baḌh ga.ī tauqīr patthar kī

gire āñkhoñ se itne laḳht-e-dil yāqūt ban ban kar

nazar aatā thā tār-e-ashk ik zanjīr patthar kī

na bal aa jaa.e 'jauhar' dast-e-nāzuk meñ ḳhudā-hāfiz

idhar hai saḳhtī-e-jāñ aur udhar shamshīr patthar kī

parastish kar raha hai har jawan-o-pir patthar ki

sanam-KHane mein aa kar jag uThi taqdir patthar ki

tasawwur ne but-e-kafir ki dil mein shakl khinchi hai

tamasha dekhiye shishe mein hai taswir patthar ki

tasawwur dil mein ashk aankhon mein lab par mohr-e-KHamoshi

bana baiTha hun un ki yaad mein taswir patthar ki

adab se zahid-e-kaba-nashin bhi chum leta hai

tumhaare dar se lag kar baDh gai tauqir patthar ki

gire aankhon se itne laKHt-e-dil yaqut ban ban kar

nazar aata tha tar-e-ashk ek zanjir patthar ki

na bal aa jae 'jauhar' dast-e-nazuk mein KHuda-hafiz

idhar hai saKHti-e-jaan aur udhar shamshir patthar ki