parda-e-chashm se lahu nikla

parda-e-chashm se lahū niklā

qatra bādal se surḳh-rū niklā

saḳht bātoñ se us kā dil TuuTā

sang-dil shoḳh tund-ḳhū niklā

hai bajā mār-e-āstīñ kahnā

rah ke pahlū meñ dil adū niklā

aañkh kā ishq meñ qusūr nahīñ

dil sarāsar mirā adū niklā

ek gul hī pe kuchh nahīñ mauqūf

vo hazāroñ se ḳhūb-rū niklā

mai ke piine meñ raat bhar zāhid

na to ham nikle aur na tū niklā

aa.ina kal huā thā ḳhāna-nashīñ

aaj kyoñ tere rū-ba-rū niklā

jaa.e kyūñkar kahīñ dil-e-vahshī

basta-e-zulf mū-ba-mū niklā

shauq-e-abrū meñ tere badr-e-munīr

māh-e-nau ban ke qibla-rū niklā

mai piyeñ barshkāl aa.ī hai

sabza duniyā meñ chaar sū niklā

tujh se sharmā ke shaam mehr chhupā

sub.h niklā to radd-e-rū niklā

chashm-e-vahdat parast vā jo huī

maiñ ne dekhā to mujh meñ tū niklā

mohtasib tū bhī sūrat-e-zāhid

dushman-e-sāġhar-o-subū niklā

dost samjhe the ham jise 'tālib'

dushman-e-jān-o-ābrū niklā

parda-e-chashm se lahu nikla

qatra baadal se surKH-ru nikla

saKHt baaton se us ka dil TuTa

sang-dil shoKH tund-KHu nikla

hai baja mar-e-astin kahna

rah ke pahlu mein dil adu nikla

aankh ka ishq mein qusur nahin

dil sarasar mera adu nikla

ek gul hi pe kuchh nahin mauquf

wo hazaron se KHub-ru nikla

mai ke pine mein raat bhar zahid

na to hum nikle aur na tu nikla

aaina kal hua tha KHana-nashin

aaj kyon tere ru-ba-ru nikla

jae kyunkar kahin dil-e-wahshi

basta-e-zulf mu-ba-mu nikla

shauq-e-abru mein tere badr-e-munir

mah-e-nau ban ke qibla-ru nikla

mai piyen barshkal aai hai

sabza duniya mein chaar su nikla

tujh se sharma ke sham mehr chhupa

subh nikla to radd-e-ru nikla

chashm-e-wahdat parast wa jo hui

main ne dekha to mujh mein tu nikla

mohtasib tu bhi surat-e-zahid

dushman-e-saghar-o-subu nikla

dost samjhe the hum jise 'talib'

dushman-e-jaan-o-abru nikla