parda-e-shab ki oT mein zohra-jamal kho gae

parda-e-shab kī oT meñ zohra-jamāl kho ga.e

dil kā kañval bujhā to shahr tīra-o-tār ho ga.e

ek hameñ hī ai sahar niiñd na aa.ī raat bhar

zānū-e-shab pe rakh ke sar saare charāġh so ga.e

raah meñ the babūl bhī rūd-e-sharar bhī dhuul bhī

jaanā hameñ zarūr thā gul ke tavāf ko ga.e

dīda-varo batā.eñ kyā tum ko yaqīñ na aa.egā

chehre the jin ke chāñd se siine meñ daaġh bo ga.e

dāġh-e-shikast dosto dekho kise nasīb ho

baiThe hue haiñ tez-rau sust-ḳhirām to ga.e

ahl-e-junūñ ke dil 'shakeb' narm the mom kī tarah

tesha-e-yās jab chalā tūda-e-sañg ho ga.e

parda-e-shab ki oT mein zohra-jamal kho gae

dil ka kanwal bujha to shahr tira-o-tar ho gae

ek hamein hi ai sahar nind na aai raat bhar

zanu-e-shab pe rakh ke sar sare charagh so gae

rah mein the babul bhi rud-e-sharar bhi dhul bhi

jaana hamein zarur tha gul ke tawaf ko gae

dida-waro bataen kya tum ko yaqin na aaega

chehre the jin ke chand se sine mein dagh bo gae

dagh-e-shikast dosto dekho kise nasib ho

baiThe hue hain tez-rau sust-KHiram to gae

ahl-e-junun ke dil 'shakeb' narm the mom ki tarah

tesha-e-yas jab chala tuda-e-sang ho gae