parde ko jo lau de wo jhalak aur hi kuchh hai

parde ko jo lau de vo jhalak aur hī kuchh hai

nādīda hai sho.ala to lapak aur hī kuchh hai

Takrāte hue jaam bhī dete haiñ khanak sī

laḌtī haiñ nigāheñ to khanak aur hī kuchh hai

ishrat-gah-e-daulat bhī hai gahvāra-e-nik.hat

mehnat ke pasīne kī mahak aur hī kuchh hai

haañ josh javānī bhī hai ik ḳhuld-e-nazāra

ik tifl kī ma.asūm humak aur hī kuchh hai

shab ko bhī mahaktī to haiñ ye adh-khilī kaliyāñ

jab chuum leñ kirneñ to mahak aur hī kuchh hai

kamzor to jhuktā hī hai qānūn ke aage

tāqat kabhī lachke to lachak aur hī kuchh hai

ashkoñ se bhī ho jaatā hai āñkhoñ meñ charāġhāñ

bin-barsī nigāhoñ kī chamak aur hī kuchh hai

ro kar bhī thake jism ko niiñd aatī hai lekin

bachche ke liye maañ kī thapak aur hī kuchh hai

bazm-e-adab-e-hind ke har gul meñ hai ḳhushbū

'mullā' gul-e-urdu kī mahak aur hī kuchh hai

parde ko jo lau de wo jhalak aur hi kuchh hai

nadida hai shoala to lapak aur hi kuchh hai

Takraate hue jam bhi dete hain khanak si

laDti hain nigahen to khanak aur hi kuchh hai

ishrat-gah-e-daulat bhi hai gahwara-e-nikhat

mehnat ke pasine ki mahak aur hi kuchh hai

han josh jawani bhi hai ek KHuld-e-nazara

ek tifl ki masum humak aur hi kuchh hai

shab ko bhi mahakti to hain ye adh-khili kaliyan

jab chum len kirnen to mahak aur hi kuchh hai

kamzor to jhukta hi hai qanun ke aage

taqat kabhi lachke to lachak aur hi kuchh hai

ashkon se bhi ho jata hai aankhon mein charaghan

bin-barsi nigahon ki chamak aur hi kuchh hai

ro kar bhi thake jism ko nind aati hai lekin

bachche ke liye man ki thapak aur hi kuchh hai

bazm-e-adab-e-hind ke har gul mein hai KHushbu

'mulla' gul-e-urdu ki mahak aur hi kuchh hai