pardon se ghar ke raaz chhupaega kya koi

pardoñ se ghar ke raaz chhupā.egā kyā koī

phūloñ se ghar kā ruup khilā.egā kyā koī

mushkil se ghar kī band havā par hai iḳhtiyār

bāhar havā ko raah dikhā.egā kyā koī

mehnat se thak ke chuur gunāhoñ kī bhiiḌ ko

achchhe-bure kā farq sikhā.egā kyā koī

bāzār ab hai ziist kī rūh-e-ravāñ magar

āb-o-havā ke daam lagā.egā kyā koī

har qism kī sharāb mayassar huī to kyā

paanī se baḌh ke pyaas bujhā.egā kyā koī

aage nikal chukī hai hayā se nazar kī baat

'dānish' kisī se aañkh milā.egā kyā koī

pardon se ghar ke raaz chhupaega kya koi

phulon se ghar ka rup khilaega kya koi

mushkil se ghar ki band hawa par hai iKHtiyar

bahar hawa ko rah dikhaega kya koi

mehnat se thak ke chur gunahon ki bhiD ko

achchhe-bure ka farq sikhaega kya koi

bazar ab hai zist ki ruh-e-rawan magar

aab-o-hawa ke dam lagaega kya koi

har qism ki sharab mayassar hui to kya

pani se baDh ke pyas bujhaega kya koi

aage nikal chuki hai haya se nazar ki baat

'danish' kisi se aankh milaega kya koi