pari-paikar jo mujh wahshi ka pairahan banate hain

parī-paikar jo mujh vahshī kā pairāhan banāte haiñ

garebāñ chaak kar dete haiñ be-dāman banāte haiñ

junūñ meñ jā-ba-jā ham jo lahū rote haiñ sahrā meñ

guloñ ke shauq meñ vīrāne ko gulshan banāte haiñ

jinheñ ishq-e-dilī hai vo tumhārā naam japne ko

tahārat se hamārī ḳhaak kī misran banāte haiñ

muraqqa' khīñchte haiñ jo tire ganj-e-shahīdāñ kā

tah-e-shamshīr har tasvīr kī gardan banāte haiñ

diyā karte ho tum jis tarah se bal zulf-e-pechāñ ko

musāfir ke liye yuuñ phāñsiyāñ rahzan banāte haiñ

hasīnān-e-chaman par ḳhātma hai jāma-zebī kā

phaTā paḌtā hai joban jo ye pairāhan banāte haiñ

hamesha shefta rakhtī hai apnī husn-e-qudrat kā

ḳhud us kī ruuh ho jaate haiñ jis kā tan banāte haiñ

irāda hai jo shamshīr-e-do-dam ke muñh pe chaḌhne kā

tire jāñ-bāz chaar ā.īna o joshan banāte haiñ

rahā karte haiñ vo dil meñ phirā karte haiñ nazroñ meñ

'atā karte haiñ nuur āñkhoñ ko dil raushan banāte haiñ

salāh-e-ishq de de kar kiye dete haiñ ḳhud rafta

tire shaidā.ī dil se dost ko dushman banāte haiñ

koī chāk-e-jigar bulbul kā gul-chīnoñ se paatā hai

nikharne ko gul apne apne pairāhan banāne haiñ

guloñ ke Dher lā lā ke chaman se us meñ phūñkeñge

qarīb-e-bostāñ bedād-gar gulḳhan banāte haiñ

madad tayyār hai naqsha iram kā khiñch ke aayā hai

shahīd-e-nāz par rahm aa gayā madfan banāte haiñ

muraqqa' khīñchte haiñ baaġh kā jo husn qudrat se

gul-e-shādāb kā kyā rang kyā roġhan banāte haiñ

ta'alluq zeb-o-zīnat se nahīñ kuchh ḳhāksāroñ ko

'sharaf' miTTī meñ rañgte haiñ jo pairāhan banāte haiñ

pari-paikar jo mujh wahshi ka pairahan banate hain

gareban chaak kar dete hain be-daman banate hain

junun mein ja-ba-ja hum jo lahu rote hain sahra mein

gulon ke shauq mein virane ko gulshan banate hain

jinhen ishq-e-dili hai wo tumhaara nam japne ko

tahaarat se hamari KHak ki misran banate hain

muraqqa' khinchte hain jo tere ganj-e-shahidan ka

tah-e-shamshir har taswir ki gardan banate hain

diya karte ho tum jis tarah se bal zulf-e-pechan ko

musafir ke liye yun phansiyan rahzan banate hain

hasinan-e-chaman par KHatma hai jama-zebi ka

phaTa paDta hai joban jo ye pairahan banate hain

hamesha shefta rakhti hai apni husn-e-qudrat ka

KHud us ki ruh ho jate hain jis ka tan banate hain

irada hai jo shamshir-e-do-dam ke munh pe chaDhne ka

tere jaan-baz chaar aaina o joshan banate hain

raha karte hain wo dil mein phira karte hain nazron mein

'ata karte hain nur aankhon ko dil raushan banate hain

salah-e-ishq de de kar kiye dete hain KHud rafta

tere shaidai dil se dost ko dushman banate hain

koi chaak-e-jigar bulbul ka gul-chinon se pata hai

nikharne ko gul apne apne pairahan banane hain

gulon ke Dher la la ke chaman se us mein phunkenge

qarib-e-bostan bedad-gar gulKHan banate hain

madad tayyar hai naqsha iram ka khinch ke aaya hai

shahid-e-naz par rahm aa gaya madfan banate hain

muraqqa' khinchte hain bagh ka jo husn qudrat se

gul-e-shadab ka kya rang kya roghan banate hain

ta'alluq zeb-o-zinat se nahin kuchh KHaksaron ko

'sharaf' miTTi mein rangte hain jo pairahan banate hain