parwa nahin usko aur mue hum

parvā nahīñ us ko aur mue ham

kyuuñ aise pe mubtalā hue ham

go piise hī Daale juuñ hinā vo

par chhoḌeñ na paañv bin chhue ham

mizhgān-e-darāz us kī kar yaad

siine pe gaḌote haiñ sue ham

rone se makān-e-ḳhāna bole

bas laakh jagah se ab chue ham

ik bāzi-e-ishq se haiñ aarī

khele haiñ vagarna sab jue ham

ḳhūbāñ ko bin us ke dekheñ kyā ḳhaak

maaTī ke samajhte haiñ thue ham

dam āñkhoñ meñ aa rahā hai, lo jaan

jald aao vagarna ab mue ham

uTh jaane se us ke 'jur.at' ai vaa.e

ma.alūm nahīñ ki kyā hue ham

parwa nahin us ko aur mue hum

kyun aise pe mubtala hue hum

go pise hi Dale jun hina wo

par chhoDen na panw bin chhue hum

mizhgan-e-daraaz us ki kar yaad

sine pe gaDote hain sue hum

rone se makan-e-KHana bole

bas lakh jagah se ab chue hum

ek bazi-e-ishq se hain aari

khele hain wagarna sab jue hum

KHuban ko bin us ke dekhen kya KHak

maTi ke samajhte hain thue hum

dam aankhon mein aa raha hai, lo jaan

jald aao wagarna ab mue hum

uTh jaane se us ke 'jurat' ai wae

malum nahin ki kya hue hum