pas-e-aina KHad-o-Khaal mein koi aur tha

pas-e-ā.ina ḳhad-o-ḳhāl meñ koī aur thā

koī sāmne thā ḳhayāl meñ koī aur thā

jo dinoñ ke dasht meñ chal rahā thā vo maiñ na thā

jo dhaḌaktā thā mah-o-sāl meñ koī aur thā

koī aur thā mire saath daur-e-urūj meñ

mire saath ahd-e-zavāl meñ koī aur thā

jise said karnā thā daam meñ vo chalā gayā

vo jo rah gayā tire jaal meñ koī aur thā

thī zamīñ ra.ūnat-e-ra.ad-o-barq se muzmahil

pas-e-abro-bād-e-jalāl meñ koī aur thā

pas-e-aina KHad-o-KHal mein koi aur tha

koi samne tha KHayal mein koi aur tha

jo dinon ke dasht mein chal raha tha wo main na tha

jo dhaDakta tha mah-o-sal mein koi aur tha

koi aur tha mere sath daur-e-uruj mein

mere sath ahd-e-zawal mein koi aur tha

jise said karna tha dam mein wo chala gaya

wo jo rah gaya tere jal mein koi aur tha

thi zamin raunat-e-rad-o-barq se muzmahil

pas-e-abro-baad-e-jalal mein koi aur tha