pas-e-diwar hujjat kis liye hai

pas-e-dīvār hujjat kis liye hai

darīche se ye vahshat kis liye hai

na maiñ apnā na maiñ terā huuñ duniyā

to phir jiine kī hasrat kis liye hai

agar suud o ziyāñ ke ham haiñ qaa.el

junūñ se apnī qurbat kis liye hai

jafā hī jab tirī pahchān Thahrī

vafā meñ mujh ko lazzat kis liye hai

mirī āñkhoñ pe jo pahra hai terā

to ā.īne se raġhbat kis liye hai

ḳhud apne ghar meñ hai jab ajnabī to

mire bhaa.ī ye shohrat kis liye hai

safar meñ jab na tere kaam aa.e

zarā ye soch daulat kis liye hai

adab hī zindagī meñ jab na aayā

adab meñ itnī mehnat kis liye hai

nikal aa.e haiñ dīvāroñ pe chehre

tasavvur kī ye jiddat kis liye hai

mirā ā.īna hai jab terā chehra

to phir duniyā kī hairat kis liye hai

ḳhamoshī hai javāb-e-jāhilāñ jab

zabāñ jaisī ye ne.amat kis liye hai

hai duniyā kā javāz is amr hī meñ

jahannam kyuuñ hai jannat kis liye hai

khile haiñ phuul sahrā meñ va-lekin

mujhe ghar meñ ye farhat kis liye hai

nahīñ vāqif hai dil īsār se jab

'atā' iz.hār-e-ulfat kis liye hai

pas-e-diwar hujjat kis liye hai

dariche se ye wahshat kis liye hai

na main apna na main tera hun duniya

to phir jine ki hasrat kis liye hai

agar sud o ziyan ke hum hain qael

junun se apni qurbat kis liye hai

jafa hi jab teri pahchan Thahri

wafa mein mujh ko lazzat kis liye hai

meri aankhon pe jo pahra hai tera

to aaine se raghbat kis liye hai

KHud apne ghar mein hai jab ajnabi to

mere bhai ye shohrat kis liye hai

safar mein jab na tere kaam aae

zara ye soch daulat kis liye hai

adab hi zindagi mein jab na aaya

adab mein itni mehnat kis liye hai

nikal aae hain diwaron pe chehre

tasawwur ki ye jiddat kis liye hai

mera aaina hai jab tera chehra

to phir duniya ki hairat kis liye hai

KHamoshi hai jawab-e-jahilan jab

zaban jaisi ye neamat kis liye hai

hai duniya ka jawaz is amr hi mein

jahannam kyun hai jannat kis liye hai

khile hain phul sahra mein wa-lekin

mujhe ghar mein ye farhat kis liye hai

nahin waqif hai dil isar se jab

'ata' izhaar-e-ulfat kis liye hai