pas-e-tark-e-ishq bhi umr-bhar taraf-e-mizha pe tari rahi

pas-e-tark-e-ishq bhī umr-bhar taraf-e-mizha pe tarī rahī

mirī kisht-e-jāñ bhī ajiib hai ki ḳhizāñ ke saath harī rahī

ka.ī baar daur-e-kasād meñ gire mehr-o-māh ke daam bhī

magar ek qīmat-e-jins-e-dil jo kharī rahī to kharī rahī

na vo rasm-e-pardagī-e-vafā na chhupā chhupā sā payām hai

na shamīm-o-gul se kalām hai na sabā kī nāma-barī rahī

maiñ tahī-nasīb sahī magar mirī chashm-e-nam ko duā to de

tirī maañg ai shab-e-zindagī sadā motiyoñ se bharī rahī

sar-e-dasht-e-tār guzār leñ kisī taur raat ye umr kī

na lagegī aañkh agar yuuñ hī hameñ fikr-e-shab-basrī rahī

pas-e-tark-e-ishq bhi umr-bhar taraf-e-mizha pe tari rahi

meri kisht-e-jaan bhi ajib hai ki KHizan ke sath hari rahi

kai bar daur-e-kasad mein gire mehr-o-mah ke dam bhi

magar ek qimat-e-jins-e-dil jo khari rahi to khari rahi

na wo rasm-e-pardagi-e-wafa na chhupa chhupa sa payam hai

na shamim-o-gul se kalam hai na saba ki nama-bari rahi

main tahi-nasib sahi magar meri chashm-e-nam ko dua to de

teri mang ai shab-e-zindagi sada motiyon se bhari rahi

sar-e-dasht-e-tar guzar len kisi taur raat ye umr ki

na lagegi aankh agar yun hi hamein fikr-e-shab-basri rahi