paspa hui sipah to parcham bhi hum hi the

paspā huī sipāh to parcham bhī ham hī the

hairat kī baat ye hai ki barham bhī ham hī the

girne lage jo suukh ke patte to ye khulā

gulshan the ham jo aap to mausam bhī ham hī the

ham hī the tere vasl se mahrūm umr bhar

lekin tere jamāl ke mahram bhī ham hī the

manzil kī be-ruḳhī ke gila-mand the hamīñ

har rāste meñ sañg-e-mujassam bhī ham hī the

apnī hī āstīñ meñ thā ḳhanjar chhupā huā

'amjad' har ek zaḳhm kā marham bhī ham hī the

paspa hui sipah to parcham bhi hum hi the

hairat ki baat ye hai ki barham bhi hum hi the

girne lage jo sukh ke patte to ye khula

gulshan the hum jo aap to mausam bhi hum hi the

hum hi the tere wasl se mahrum umr bhar

lekin tere jamal ke mahram bhi hum hi the

manzil ki be-ruKHi ke gila-mand the hamin

har raste mein sang-e-mujassam bhi hum hi the

apni hi aastin mein tha KHanjar chhupa hua

'amjad' har ek zaKHm ka marham bhi hum hi the