patthar ko pujte the ki patthar pighal paDa

patthar ko pūjte the ki patthar pighal paḌā

pal bhar meñ phir chaTān se chashma ubal paḌā

jal thal kā ḳhvāb thā ki kināre Dubo gayā

tanhā kañval bhī jhiil se bāhar nikal paḌā

ā.īne ke visāl se raushan huā charāġh

par lau se is charāġh kī ā.īna jal paḌā

guzrā gumāñ se ḳhat-e-farāmoshī-e-yaqīñ

aur aa.ine meñ silsila-e-aks chal paḌā

mat pūchhiye ki kyā thī sadā vo faqīr kī

kahiye sukūt-e-shahr meñ kaisā ḳhalal paḌā

baaqī rahūñgā yā nahīñ sochā nahīñ 'sa'īd'

apne madār se yūñhī ik din nikal paḌā

patthar ko pujte the ki patthar pighal paDa

pal bhar mein phir chaTan se chashma ubal paDa

jal thal ka KHwab tha ki kinare Dubo gaya

tanha kanwal bhi jhil se bahar nikal paDa

aaine ke visal se raushan hua charagh

par lau se is charagh ki aaina jal paDa

guzra guman se KHat-e-faramoshi-e-yaqin

aur aaine mein silsila-e-aks chal paDa

mat puchhiye ki kya thi sada wo faqir ki

kahiye sukut-e-shahr mein kaisa KHalal paDa

baqi rahunga ya nahin socha nahin 'sa'id'

apne madar se yunhi ek din nikal paDa