pattharon ne ye tamasha to kabhi dekha na tha

pattharoñ ne ye tamāshā to kabhī dekhā na thā

itnī ḳhāmoshī se koī aa.ina TuuTā na thā

dard ke sāgar meñ lahreñ is tarah machlī na thiiñ

ġham kī peshānī pe koī chāñd yuuñ chamkā na thā

suunī galiyoñ meñ bhaTaktī phir rahī thī chāñdnī

shahr-e-shab ke rāstoñ par ek maiñ tanhā na thā

jis ne raushan kar diye bujhtī umīdoñ ke charāġh

sāñvlā saaya thā koī nuur kā sho.ala na thā

manziloñ par bhī raheñge qurbatoñ ke fāsle

ham ne hañgām-e-safar 'akram' kabhī sochā na thā

pattharon ne ye tamasha to kabhi dekha na tha

itni KHamoshi se koi aaina TuTa na tha

dard ke sagar mein lahren is tarah machli na thin

gham ki peshani pe koi chand yun chamka na tha

suni galiyon mein bhaTakti phir rahi thi chandni

shahr-e-shab ke raston par ek main tanha na tha

jis ne raushan kar diye bujhti umidon ke charagh

sanwla saya tha koi nur ka shoala na tha

manzilon par bhi rahenge qurbaton ke fasle

hum ne hangam-e-safar 'akram' kabhi socha na tha