pazhmurda dil hai wasl ke arman ko kya hua

pazhmurda dil hai vasl ke armāñ ko kyā huā

rotā huuñ maiñ bahār-e-gulistāñ ko kyā huā

kab tak uḌā.ūñ hijr meñ dāman kī dhajjiyāñ

ai sub.h tere chāk-garebāñ ko kyā huā

bulbul ke chahchahe haiñ na koī shagufta phuul

ai bāġhbāñ bahār-e-gulistāñ ko kyā huā

dil chiir kar dikhāne kī shai ho to maiñ dikhā.ūñ

furqat kī raat sadma mirī jaañ ko kyā huā

dushman kā sog saaf hai chehre se āshkār

ā.īna dekh zulf-e-pareshāñ ko kyā huā

bulbul hai chup fasurda chaman luT ga.ī bahār

maiñ ne kiyā jo chāk-e-garebāñ ko kyā huā

mahv-e-jamāl ho ga.e ā.īna dekh kar

tum kah rahe the nargis-e-hairāñ ko kyā huā

maiñ un ko is savāl kā ab kyā javāb duuñ

dāman ko āstīñ ko garebāñ ko kyā huā

kāñTe hazār dil meñ haiñ kis kis ko roiye

phūloñ ko bulbuloñ ko gulistāñ ko kyā huā

dil TukḌe ho ke sabr kā dāman huā hai chaak

kis se kahūñ ki chāk-garebāñ ko kyā huā

uljhā huā hai 'shād' kā dil baal kyā baneñ

vo kah rahe haiñ zulf-e-pareshāñ ko kyā huā

pazhmurda dil hai wasl ke arman ko kya hua

rota hun main bahaar-e-gulistan ko kya hua

kab tak uDaun hijr mein daman ki dhajjiyan

ai subh tere chaak-gareban ko kya hua

bulbul ke chahchahe hain na koi shagufta phul

ai baghban bahaar-e-gulistan ko kya hua

dil chir kar dikhane ki shai ho to main dikhaun

furqat ki raat sadma meri jaan ko kya hua

dushman ka sog saf hai chehre se aashkar

aaina dekh zulf-e-pareshan ko kya hua

bulbul hai chup fasurda chaman luT gai bahaar

main ne kiya jo chaak-e-gareban ko kya hua

mahw-e-jamal ho gae aaina dekh kar

tum kah rahe the nargis-e-hairan ko kya hua

main un ko is sawal ka ab kya jawab dun

daman ko aastin ko gareban ko kya hua

kanTe hazar dil mein hain kis kis ko roiye

phulon ko bulbulon ko gulistan ko kya hua

dil TukDe ho ke sabr ka daman hua hai chaak

kis se kahun ki chaak-gareban ko kya hua

uljha hua hai 'shad' ka dil baal kya banen

wo kah rahe hain zulf-e-pareshan ko kya hua