phal jae mohabbat to mohabbat hai mohabbat

phal jaa.e mohabbat to mohabbat hai mohabbat

aur raas na aa.e to musībat hai mohabbat

sarmāya-e-dīvana-e-ulfat hai mohabbat

ai ulTe hue dil tirī qīmat hai mohabbat

hai ham hī talak ḳhair ġhanīmat hai mohabbat

ho jaa.e unheñ bhī to qayāmat hai mohabbat

ro ro ke vo pochheñge mirī aañkh se aañsū

ā.eñge vo din bhī jo salāmat hai mohabbat

badnām kiyā laakh tujhe ḳhud-ġharazoñ ne

phir bhī tirī duniyā ko zarūrat hai mohabbat

duniyā kahe kuchh hai magar īmān kī ye baat

hone kī tarah ho to ibādat hai mohabbat

hai jin se un āñkhoñ kī qasam khātā huuñ 'manzar'

mere liye parvāna-e-jannat hai mohabbat

phal jae mohabbat to mohabbat hai mohabbat

aur ras na aae to musibat hai mohabbat

sarmaya-e-diwana-e-ulfat hai mohabbat

ai ulTe hue dil teri qimat hai mohabbat

hai hum hi talak KHair ghanimat hai mohabbat

ho jae unhen bhi to qayamat hai mohabbat

ro ro ke wo pochhenge meri aankh se aansu

aaenge wo din bhi jo salamat hai mohabbat

badnam kiya lakh tujhe KHud-gharazon ne

phir bhi teri duniya ko zarurat hai mohabbat

duniya kahe kuchh hai magar iman ki ye baat

hone ki tarah ho to ibaadat hai mohabbat

hai jin se un aankhon ki qasam khata hun 'manzar'

mere liye parwana-e-jannat hai mohabbat