pher jo paDna tha qismat mein wo hasb-e-mamul paDa

pher jo paḌnā thā qismat meñ vo hasb-e-ma.amūl paḌā

ḳhanda-e-gul se uḌā vo sharāra ḳhirman-e-dil par phuul paḌā

dekh idhar o niiñd ke maate kis kī achānak yaad aa.ī

biich se TuuTī hai añgḌā.ī haath uThte hī jhuul paḌā

husn-o-ishq kī an-ban kyā hai dil ke phañsāne kā phandā

apne hāthoñ ḳhud aafat meñ jā ke ye nā-māqūl paḌā

kaun kahe qismat palTī yā mat palTī sailānī kī

rasta kaaT ke jaane vaalā aaj idhar bhī bhuul paḌā

haal nahīñ jiine ke qābil aas nahīñ marne detī

eḌiyāñ ragḌe āḳhir kab tak ḳhaak par ik maqtūl paḌā

jitne husn-ābād meñ pahuñche hosh-o-ḳhirad kho kar pahuñche

maal bhī to itne kā nahīñ ab jitnā kuchh mahsūl paḌā

rāh-e-vafā thī TeḌhī bigḌī thī har gaam uftād na.ī

paañv kisī kā TuuT gayā aur haath kisī kā jhuul paḌā

baaġh meñ gulchīñ hai na hai maalī bijlī hai na falak pe sahāb

ahd-e-ḳhizāñ meñ jalā hai nasheman aa ke kahāñ se phuul paḌā

paañv kī tāqat taaq huī to band kī aañkh aur jā pahuñche

'ārzū' us ko ḳhuub kiyā kam rāste meñ jo tuul paḌā

pher jo paDna tha qismat mein wo hasb-e-mamul paDa

KHanda-e-gul se uDa wo sharara KHirman-e-dil par phul paDa

dekh idhar o nind ke mate kis ki achanak yaad aai

bich se TuTi hai angDai hath uThte hi jhul paDa

husn-o-ishq ki an-ban kya hai dil ke phansane ka phanda

apne hathon KHud aafat mein ja ke ye na-maqul paDa

kaun kahe qismat palTi ya mat palTi sailani ki

rasta kaT ke jaane wala aaj idhar bhi bhul paDa

haal nahin jine ke qabil aas nahin marne deti

eDiyan ragDe aaKHir kab tak KHak par ek maqtul paDa

jitne husn-abaad mein pahunche hosh-o-KHirad kho kar pahunche

mal bhi to itne ka nahin ab jitna kuchh mahsul paDa

rah-e-wafa thi TeDhi bigDi thi har gam uftad nai

panw kisi ka TuT gaya aur hath kisi ka jhul paDa

bagh mein gulchin hai na hai mali bijli hai na falak pe sahab

ahd-e-KHizan mein jala hai nasheman aa ke kahan se phul paDa

panw ki taqat taq hui to band ki aankh aur ja pahunche

'arzu' us ko KHub kiya kam raste mein jo tul paDa