pher roz-e-firaq-e-yar aaya

pher roz-e-firāq-e-yār aayā

nāma-bar aah zaar zaar aayā

tere jaane se fitna ho tayyār

ba-sar-e-chashm ashk-bār aayā

jhāḌā marqad pe mere jab dāman

āsmāñ kā goyā ġhubār aayā

mai se tauba to kar nahīñ saktā

kyā karūñ mausam-e-bahār aayā

maarā jāvegā bhaag ai nāseh

dekh ye nāznīñ savār aayā

kisī maḳhlūq ko ḳhudā na dikhā.e

jo ki mujh par dar-intizār aayā

is kī bedād kā ḳhudā de ajr

haath meñ le ke zul-fiqār aayā

kahtā hai sar jhukā jo āshiq hai

maiñ to ab mā.il-e-shikār aayā

'āfrīdī' samajh hayāt-e-abad

qatl ko tere gar vo yaar aayā

peshvā.ī ko is kī jā jaldī

kah ki hāzir gunāhgār aayā

tujhe 'qāsim-alī' ḳhudā kī qasam

kaise zālim pe e'tibār aayā

pher roz-e-firaq-e-yar aaya

nama-bar aah zar zar aaya

tere jaane se fitna ho tayyar

ba-sar-e-chashm ashk-bar aaya

jhaDa marqad pe mere jab daman

aasman ka goya ghubar aaya

mai se tauba to kar nahin sakta

kya karun mausam-e-bahaar aaya

mara jawega bhag ai naseh

dekh ye naznin sawar aaya

kisi maKHluq ko KHuda na dikhae

jo ki mujh par dar-intizar aaya

is ki bedad ka KHuda de ajr

hath mein le ke zul-fiqar aaya

kahta hai sar jhuka jo aashiq hai

main to ab mail-e-shikar aaya

'afridi' samajh hayat-e-abad

qatl ko tere gar wo yar aaya

peshwai ko is ki ja jaldi

kah ki hazir gunahgar aaya

tujhe 'qasim-ali' KHuda ki qasam

kaise zalim pe e'tibar aaya