phir aai fasl-e-gul phir zaKHm-e-dil rah rah ke pakte hain

phir aa.ī fasl-e-gul phir zaḳhm-e-dil rah rah ke pakte haiñ

magar dāġh-e-jigar par sūrat-e-lāla lahakte haiñ

nasīhat hai abas nāseh bayāñ nāhaq hī bakte haiñ

jo bahke duḳht-e-raz se haiñ vo kab in se bahakte haiñ

koī jā kar kaho ye āḳhirī paiġhām us but se

are aa jā abhī dam tan meñ baaqī hai sisakte haiñ

na bosa lene dete haiñ na lagte haiñ gale mere

abhī kam-umr haiñ har baat par mujh se jhijakte haiñ

vo ġhairoñ ko adā se qatl jab bebāk karte haiñ

to us kī teġh ko ham aah kis hairat se takte haiñ

uḌā laa.e ho ye tarz-e-suḳhan kis se batāo to

dam-e-taqdīr goyā baaġh meñ bulbul chahakte haiñ

'rasā' kī hai talāsh-e-yār meñ ye dasht-paimā.ī

ki misl-e-shīsha mere paañv ke chhāle jhalakte haiñ

phir aai fasl-e-gul phir zaKHm-e-dil rah rah ke pakte hain

magar dagh-e-jigar par surat-e-lala lahakte hain

nasihat hai abas naseh bayan nahaq hi bakte hain

jo bahke duKHt-e-raz se hain wo kab in se bahakte hain

koi ja kar kaho ye aaKHiri paigham us but se

are aa ja abhi dam tan mein baqi hai sisakte hain

na bosa lene dete hain na lagte hain gale mere

abhi kam-umr hain har baat par mujh se jhijakte hain

wo ghairon ko ada se qatl jab bebak karte hain

to us ki tegh ko hum aah kis hairat se takte hain

uDa lae ho ye tarz-e-suKHan kis se batao to

dam-e-taqdir goya bagh mein bulbul chahakte hain

'rasa' ki hai talash-e-yar mein ye dasht-paimai

ki misl-e-shisha mere panw ke chhaale jhalakte hain