phir aaina-e-alam shayad ki nikhar jae

phir ā.īna-e-ālam shāyad ki nikhar jaa.e

phir apnī nazar shāyad tā-hadd-e-nazar jaa.e

sahrā pe lage pahre aur qufl paḌe ban par

ab shahr-badar ho kar dīvāna kidhar jaa.e

ḳhāk-e-rah-e-jānāñ par kuchh ḳhuuñ thā girau apnā

is fasl meñ mumkin hai ye qarz utar jaa.e

dekh aa.eñ chalo ham bhī jis bazm meñ sunte haiñ

jo ḳhanda-ba-lab aa.e vo ḳhāk-basar jaa.e

yā ḳhauf se dar-guzreñ yā jaañ se guzar jaa.eñ

marnā hai ki jiinā hai ik baat Thahar jaa.e

phir aaina-e-alam shayad ki nikhar jae

phir apni nazar shayad ta-hadd-e-nazar jae

sahra pe lage pahre aur qufl paDe ban par

ab shahr-badar ho kar diwana kidhar jae

KHak-e-rah-e-jaanan par kuchh KHun tha girau apna

is fasl mein mumkin hai ye qarz utar jae

dekh aaen chalo hum bhi jis bazm mein sunte hain

jo KHanda-ba-lab aae wo KHak-basar jae

ya KHauf se dar-guzren ya jaan se guzar jaen

marna hai ki jina hai ek baat Thahar jae