phir aaj dard se raushan hua hai sina-e-KHwab

phir aaj dard se raushan huā hai sīna-e-ḳhvāb

sajā huā hai mire zaḳhm se madīna-e-ḳhvāb

ḳhizāñ kī fasl meñ jo rizq-e-vahshat-e-shab thā

luTā rahā huuñ sar-e-shab vahī ḳhazīna-e-ḳhvāb

musāfirān-e-shab-e-ġham tumhārī ḳhair to hai

taḌaḳh ke TuuT gayā kyuuñ mirā nagīna-e-ḳhvāb

haqīqatoñ ke bhañvar se koī nikāle phir

ravāñ kare mirī jānib koī safīna-e-ḳhvāb

banā diyā tirī sohbat ne be-adab in ko

koī sikhā.e in āñkhoñ ko ab qarīna-e-ḳhvāb

koī to ho ki jo mujh ko fareb-e-paiham de

vo koī husn-e-haqīqat ho yā hasīna-e-ḳhvāb

ye aañkh hai hama-dam gardish-e-tajassus meñ

talāsh kartī hai mujh meñ koī dafīna-e-ḳhvāb

fishār-e-nīm-shabī se ab in dinoñ 'shāhid'

hai chaak chaak mirī jaañ qabā-e-sīna-e-ḳhvāb

phir aaj dard se raushan hua hai sina-e-KHwab

saja hua hai mere zaKHm se madina-e-KHwab

KHizan ki fasl mein jo rizq-e-wahshat-e-shab tha

luTa raha hun sar-e-shab wahi KHazina-e-KHwab

musafiran-e-shab-e-gham tumhaari KHair to hai

taDaKH ke TuT gaya kyun mera nagina-e-KHwab

haqiqaton ke bhanwar se koi nikale phir

rawan kare meri jaanib koi safina-e-KHwab

bana diya teri sohbat ne be-adab in ko

koi sikhae in aankhon ko ab qarina-e-KHwab

koi to ho ki jo mujh ko fareb-e-paiham de

wo koi husn-e-haqiqat ho ya hasina-e-KHwab

ye aankh hai hama-dam gardish-e-tajassus mein

talash karti hai mujh mein koi dafina-e-KHwab

fishaar-e-nim-shabi se ab in dinon 'shahid'

hai chaak chaak meri jaan qaba-e-sina-e-KHwab