phir aisa moD is qisse mein aaya

phir aisā moḌ is qisse meñ aayā

maiñ sadiyāñ ghuum kar lamhe meñ aayā

mirā rasta kisī jañgal se guzrā

ki ḳhud jañgal mire raste meñ aayā

kisī ke arsh par hone kā da.avā

samajh ik shab mujhe nashshe meñ aayā

maiñ apne ghar baḌī muddat se ke ba.ad aaj

kisī mehmān ke dhoke meñ aayā

tirā kirdār chalte-phirte ik din

mirī rūdād ke kūche meñ aayā

yūñhī ik din hujūm-e-ḳhāl-o-ḳhad meñ

nazar ḳhud ko vo ā.īne meñ aayā

muñDeroñ se utar kar ḳhauf koī

dabe paañv mire kamre meñ aayā

phir aisa moD is qisse mein aaya

main sadiyan ghum kar lamhe mein aaya

mera rasta kisi jangal se guzra

ki KHud jangal mere raste mein aaya

kisi ke arsh par hone ka dawa

samajh ek shab mujhe nashshe mein aaya

main apne ghar baDi muddat se ke baad aaj

kisi mehman ke dhoke mein aaya

tera kirdar chalte-phirte ek din

meri rudad ke kuche mein aaya

yunhi ek din hujum-e-KHal-o-KHad mein

nazar KHud ko wo aaine mein aaya

munDeron se utar kar KHauf koi

dabe panw mere kamre mein aaya