phir charagh-e-lala se raushan hue koh o daman

phir charāġh-e-lāla se raushan hue koh o daman

mujh ko phir naġhmoñ pe uksāne lagā murġh-e-chaman

phuul haiñ sahrā meñ yā pariyāñ qatār andar qatār

uude uude niile niile piile piile pairahan

barg-e-gul par rakh ga.ī shabnam kā motī bād-e-sub.h

aur chamkātī hai us motī ko sūraj kī kiran

husn-e-be-parvā ko apnī be-naqābī ke liye

hoñ agar shahroñ se ban pyāre to shahr achchhe ki ban

apne man meñ Duub kar pā jā surāġh-e-zindagī

tū agar merā nahīñ bantā na ban apnā to ban

man kī duniyā man kī duniyā soz o mastī jazb o shauq

tan kī duniyā tan kī duniyā suud o saudā makr o fan

man kī daulat haath aatī hai to phir jaatī nahīñ

tan kī daulat chhāñv hai aatā hai dhan jaatā hai dhan

man kī duniyā meñ na paayā maiñ ne afrañgī kā raaj

man kī duniyā meñ na dekhe maiñ ne shaiḳh o barhaman

paanī paanī kar ga.ī mujko qalandar kī ye baat

tū jhukā jab ġhair ke aage na man terā na tan

phir charagh-e-lala se raushan hue koh o daman

mujh ko phir naghmon pe uksane laga murgh-e-chaman

phul hain sahra mein ya pariyan qatar andar qatar

ude ude nile nile pile pile pairahan

barg-e-gul par rakh gai shabnam ka moti baad-e-subh

aur chamkati hai us moti ko suraj ki kiran

husn-e-be-parwa ko apni be-naqabi ke liye

hon agar shahron se ban pyare to shahr achchhe ki ban

apne man mein Dub kar pa ja suragh-e-zindagi

tu agar mera nahin banta na ban apna to ban

man ki duniya man ki duniya soz o masti jazb o shauq

tan ki duniya tan ki duniya sud o sauda makr o fan

man ki daulat hath aati hai to phir jati nahin

tan ki daulat chhanw hai aata hai dhan jata hai dhan

man ki duniya mein na paya main ne afrangi ka raj

man ki duniya mein na dekhe main ne shaiKH o barhaman

pani pani kar gai mujko qalandar ki ye baat

tu jhuka jab ghair ke aage na man tera na tan