phir hui sham bayaban ko pagal nikla

phir huī shaam bayābān ko pāgal niklā

haath meñ le ke charāġh-e-dil-e-be-kal niklā

terī mahfil ko sajāne ka.ī jugnū aa.e

chāñd lahrā ke shab-e-tār kā āñchal niklā

'umr bhar kar ke safar ham jo vahāñ tak pahuñche

hāe-qismat ki vo darvāza muqaffal niklā

yaañ to maz.hab bhī hai tahzīb-o-tamaddun phir bhī

maiñ jise shahr samajhtā thā vo jangal niklā

yuuñ girānī ne tabī'at kī satāyā shab bhar

aañkh se ashk jo niklā bhī to bojhal niklā

tū ne sar māñgā to is shahr meñ sab se pahle

sar-ba-kaf terā divāna sū-e-maqtal niklā

raushnī ke liye jab dil ko jalāyā ham ne

dil se niklā to dhueñ kā koī bādal niklā

ham ko tohfe meñ jo baḳhshī ga.ī ik umr-e-tavīl

vaqt ke taul meñ tolā to vo ik pal niklā

vaqt-e-ruḳhsat huiiñ dulhan kī jo āñkheñ bojhal

qatra-e-ashk meñ lipTā huā kājal niklā

us ne jo āb-e-baqā kah ke diyā thā 'farhat'

mere to vāste vo zahr-e-halāhal niklā

phir hui sham bayaban ko pagal nikla

hath mein le ke charagh-e-dil-e-be-kal nikla

teri mahfil ko sajaane kai jugnu aae

chand lahra ke shab-e-tar ka aanchal nikla

'umr bhar kar ke safar hum jo wahan tak pahunche

hae-qismat ki wo darwaza muqaffal nikla

yan to mazhab bhi hai tahzib-o-tamaddun phir bhi

main jise shahr samajhta tha wo jangal nikla

yun girani ne tabi'at ki sataya shab bhar

aankh se ashk jo nikla bhi to bojhal nikla

tu ne sar manga to is shahr mein sab se pahle

sar-ba-kaf tera diwana su-e-maqtal nikla

raushni ke liye jab dil ko jalaya hum ne

dil se nikla to dhuen ka koi baadal nikla

hum ko tohfe mein jo baKHshi gai ek umr-e-tawil

waqt ke taul mein tola to wo ek pal nikla

waqt-e-ruKHsat huin dulhan ki jo aankhen bojhal

qatra-e-ashk mein lipTa hua kajal nikla

us ne jo aab-e-baqa kah ke diya tha 'farhat'

mere to waste wo zahr-e-halahal nikla