phir koi shakl nazar aane lagi pani par

phir koī shakl nazar aane lagī paanī par

saḳht mushkil meñ huuñ is tarha kī āsānī par

us ko parvā hī nahīñ hai ki vo kis haal meñ hai

maiñ hī mahjūb huā ḳhvāb kī uryānī par

kartā rahtā huuñ maiñ us but kī parastish hamā-vaqt

phir bhī shak hai use is jazba-e-īmānī par

ik sadā hai kahīñ rātoñ meñ safar kartī huī

ik havā hai kahīñ aa.ī huī jaulānī par

koī ruktā huā dariyā mire qadmoñ meñ kahīñ

koī jhuktā huā sūraj mirī peshānī par

vahī mānūs thapeḌe the mire chāroñ taraf

mujhe hairat na huī dhuup kī tābānī par

vāpsī par jo lage haiñ mujhe apne jaise

ḳhush huā huuñ dar-o-dīvār kī vīrānī par

ek din sub.h jo uTTheñ to ye duniyā hī na ho

hai madār ab kisī aisī hī ḳhush-imkānī par

sher hote haiñ 'zafar' lutf-e-suḳhan se ḳhālī

daad miltī hai mujhe ab to ḳhush-alhānī par

phir koi shakl nazar aane lagi pani par

saKHt mushkil mein hun is tarha ki aasani par

us ko parwa hi nahin hai ki wo kis haal mein hai

main hi mahjub hua KHwab ki uryani par

karta rahta hun main us but ki parastish hama-waqt

phir bhi shak hai use is jazba-e-imani par

ek sada hai kahin raaton mein safar karti hui

ek hawa hai kahin aai hui jaulani par

koi rukta hua dariya mere qadmon mein kahin

koi jhukta hua suraj meri peshani par

wahi manus thapeDe the mere chaaron taraf

mujhe hairat na hui dhup ki tabani par

wapsi par jo lage hain mujhe apne jaise

KHush hua hun dar-o-diwar ki virani par

ek din subh jo uTThen to ye duniya hi na ho

hai madar ab kisi aisi hi KHush-imkani par

sher hote hain 'zafar' lutf-e-suKHan se KHali

dad milti hai mujhe ab to KHush-alhani par