phir lauTa hai KHurshid-e-jahan-tab safar se
phir lauTā hai ḳhurshīd-e-jahāñ-tāb safar se
phir nūr-e-sahar dast-o-garebāñ hai sahar se
phir aag bhaḌakne lagī har sāz-e-tarab meñ
phir sho.ale lapakne lage har dīda-e-tar se
phir niklā hai dīvāna koī phūñk ke ghar ko
kuchh kahtī hai har raah har ik rāhguzar se
vo rañg hai imsāl gulistāñ kī fazā kā
ojhal huī dīvār-e-qafas hadd-e-nazar se
sāġhar to khanakte haiñ sharāb aa.e na aa.e
bādal to garajte haiñ ghaTā barse na barse
pā-posh kī kyā fikr hai dastār sambhālā
pāyāb hai jo mauj guzar jā.egī sar se
phir lauTa hai KHurshid-e-jahan-tab safar se
phir nur-e-sahar dast-o-gareban hai sahar se
phir aag bhaDakne lagi har saz-e-tarab mein
phir shoale lapakne lage har dida-e-tar se
phir nikla hai diwana koi phunk ke ghar ko
kuchh kahti hai har rah har ek rahguzar se
wo rang hai imsal gulistan ki faza ka
ojhal hui diwar-e-qafas hadd-e-nazar se
saghar to khanakte hain sharab aae na aae
baadal to garajte hain ghaTa barse na barse
pa-posh ki kya fikr hai dastar sambhaala
payab hai jo mauj guzar jaegi sar se
- Book : Nuskha Hai Wafa (Kulliyat-e-Faiz) (Pg. 84)
- Publication : Educational Publishing House (2009)
- Edition : 2009
Additional information available
Click on the INTERESTING button to view additional information associated with this sher.
About this sher
Lorem ipsum dolor sit amet, consectetur adipiscing elit. Morbi volutpat porttitor tortor, varius dignissim.
rare Unpublished content
This ghazal contains ashaar not published in the public domain. These are marked by a red line on the left.
