phir meri aankh teri yaad se bhar aai hai

phir mirī aañkh tirī yaad se bhar aa.ī hai

phir tasavvur meñ vahī jalva-e-zebā.ī hai

dasht-e-ġhurbat meñ vahī ālam-e-tanhā.ī hai

sar meñ saudā hai tirā aur tirā saudā.ī hai

kyā irāda hai mirī ziist kā maiñ kyā jānūñ

kashtī-e-umr mirī maut se Takrā.ī hai

ulfat-e-sāqī-e-mahvash ke tasavvur meñ sharāb

aaj sāġhar meñ parī ban ke utar aa.ī hai

aa.ina dekh ke lillāh na hairāñ hoñ aap

is meñ mastūr jo afsāna-e-ra.anā.ī hai

ek hañgāma-e-mahshar hai bapā gulshan meñ

phir se ḳhatre meñ koī ahd-e-shakebā.ī hai

aate haiñ zabt kī pursish ke liye vo shāyad

phir se jumbish meñ mirā zauq-e-tamāshā.ī hai

phir meri aankh teri yaad se bhar aai hai

phir tasawwur mein wahi jalwa-e-zebai hai

dasht-e-ghurbat mein wahi aalam-e-tanhai hai

sar mein sauda hai tera aur tera saudai hai

kya irada hai meri zist ka main kya jaanun

kashti-e-umr meri maut se Takrai hai

ulfat-e-saqi-e-mahwash ke tasawwur mein sharab

aaj saghar mein pari ban ke utar aai hai

aaina dekh ke lillah na hairan hon aap

is mein mastur jo afsana-e-ranai hai

ek hangama-e-mahshar hai bapa gulshan mein

phir se KHatre mein koi ahd-e-shakebai hai

aate hain zabt ki pursish ke liye wo shayad

phir se jumbish mein mera zauq-e-tamashai hai