phir shab-e-gham ne mujhe shakl dikhai kyunkar

phir shab-e-ġham ne mujhe shakl dikhā.ī kyūñkar

ye balā ghar se nikālī huī aa.ī kyūñkar

kaT sake saḳhti-e-ayyām-e-judā.ī kyūñkar

ġhair ko aa.e ilāhī mirī aa.ī kyūñkar

tū ne kī ġhair se kal merī burā.ī kyūñkar

gar na thī dil meñ to lab par tire aa.ī kyūñkar

na kahūñgā na kahūñgā na kahūñgā hargiz

jā ke us bazm meñ shāmat mirī aa.ī kyūñkar

khul ga.ī baat jab un kī to vo pūchhte haiñ

muñh se niklī huī hotī hai parā.ī kyūñkar

dād-ḳhvāhoñ se vo kahte haiñ ki ham bhī to suneñ

doge tum hashr meñ sab mil ke duhā.ī kyūñkar

tum dil-āzār o sitamgar nahīñ maiñ ne maanā

maan jā.egī ise saarī ḳhudā.ī kyūñkar

nā-gahāñ shikva-e-bedād to kar baiThe ham

ab ye hai fikr kareñ un se safā.ī kyūñkar

aap meñ bhī to rahī ātish-e-tar kī tezī

aag paanī meñ ye saaqī ne lagā.ī kyūñkar

allāh allāh butoñ ko hai ye dast-e-qudrat

un kī muTThī meñ rahī saarī ḳhudā.ī kyūñkar

vo yahāñ aa.eñ vahāñ ġhair kā ghar ho barbād

is tarah se ho safā.ī meñ safā.ī kyūñkar

majlis-e-vāz ko dekhā to kahā rindoñ ne

hogī is bhiiḌ kī jannat meñ samā.ī kyūñkar

ā.īna dekh kar vo kahne lage aap hī aap

aise achchhoñ kī kare koī burā.ī kyūñkar

kasrat-e-ranj-o-alam sun ke ye ilzām milā

itne se dil meñ hai itnoñ kī samā.ī kyūñkar

us ne sadqe meñ kiye aaj hazāroñ āzād

dekhiye hotī hai āshiq kī rihā.ī kyūñkar

'dāġh' ko mehr kahā ashk ko dariyā ham ne

aur phir karte haiñ chhoToñ kī baḌā.ī kyūñkar

'dāġh' kal to duā aap kī maqbūl na thī

aaj muñh-māñgī murād aap ne paa.ī kyūñkar

phir shab-e-gham ne mujhe shakl dikhai kyunkar

ye bala ghar se nikali hui aai kyunkar

kaT sake saKHti-e-ayyam-e-judai kyunkar

ghair ko aae ilahi meri aai kyunkar

tu ne ki ghair se kal meri burai kyunkar

gar na thi dil mein to lab par tere aai kyunkar

na kahunga na kahunga na kahunga hargiz

ja ke us bazm mein shamat meri aai kyunkar

khul gai baat jab un ki to wo puchhte hain

munh se nikli hui hoti hai parai kyunkar

dad-KHwahon se wo kahte hain ki hum bhi to sunen

doge tum hashr mein sab mil ke duhai kyunkar

tum dil-azar o sitamgar nahin main ne mana

man jaegi ise sari KHudai kyunkar

na-gahan shikwa-e-bedad to kar baiThe hum

ab ye hai fikr karen un se safai kyunkar

aap mein bhi to rahi aatish-e-tar ki tezi

aag pani mein ye saqi ne lagai kyunkar

allah allah buton ko hai ye dast-e-qudrat

un ki muTThi mein rahi sari KHudai kyunkar

wo yahan aaen wahan ghair ka ghar ho barbaad

is tarah se ho safai mein safai kyunkar

majlis-e-waz ko dekha to kaha rindon ne

hogi is bhiD ki jannat mein samai kyunkar

aaina dekh kar wo kahne lage aap hi aap

aise achchhon ki kare koi burai kyunkar

kasrat-e-ranj-o-alam sun ke ye ilzam mila

itne se dil mein hai itnon ki samai kyunkar

us ne sadqe mein kiye aaj hazaron aazad

dekhiye hoti hai aashiq ki rihai kyunkar

'dagh' ko mehr kaha ashk ko dariya hum ne

aur phir karte hain chhoTon ki baDai kyunkar

'dagh' kal to dua aap ki maqbul na thi

aaj munh-mangi murad aap ne pai kyunkar