phir usi shahr ka fasana chheD

phir usī shahr kā fasāna chheḌ

mutriba tarz-e-āshiqāna chheḌ

sāz-e-dil se uThā thā jo ik baar

phir vahī raag vālihāna chheḌ

ghar hai tārīk yūrish-e-ġham se

aaj ik ātishīñ tarāna chheḌ

phir jahāñ dilkashī se hai mahrūm

zulf-e-hastī ko misl-e-shāna chheḌ

bazm ḳhauf-e-fanā se hai be-dam

kuchh ba-andāz-e-jāvedāna chheḌ

aaj har shai se bad-gumāñ haiñ ham

mat hameñ ai ġham-e-zamāna chheḌ

ai ġham-e-yār ham haiñ ḳhākistar

aur mat ai rafīq-e-ḳhāna chheḌ

'arsh' thī har sukūñ kī jo rahzan

us qayāmat kā phir fasāna chheḌ

phir usi shahr ka fasana chheD

mutriba tarz-e-ashiqana chheD

saz-e-dil se uTha tha jo ek bar

phir wahi rag walihana chheD

ghar hai tarik yurish-e-gham se

aaj ek aatishin tarana chheD

phir jahan dilkashi se hai mahrum

zulf-e-hasti ko misl-e-shana chheD

bazm KHauf-e-fana se hai be-dam

kuchh ba-andaz-e-jawedana chheD

aaj har shai se bad-guman hain hum

mat hamein ai gham-e-zamana chheD

ai gham-e-yar hum hain KHakistar

aur mat ai rafiq-e-KHana chheD

'arsh' thi har sukun ki jo rahzan

us qayamat ka phir fasana chheD