phir wo be-samt uDanon ki kahani sun kar

phir vo be-samt uḌānoñ kī kahānī sun kar

so gayā peḌ parindoñ kī kahānī sun kar

kyā yahī ḳhvāb kī tā'bīr huā kartī hai

uḌ ga.ī niiñd bhī āñkhoñ kī kahānī sun kar

aable aise kabhī phuuT ke nā ro.e the

jis tarah ro.e haiñ kāñToñ kī kahānī sun kar

ham vo sahrā ke musāfir haiñ abhī tak jin kī

pyaas bujhtī hai sarāboñ kī kahānī sun kar

dard kī had se guzar kar to yahī honā thā

aañkh pathrā ga.ī ashkoñ kī kahānī sun kar

kashtiyāñ lauT to aa.ī haiñ magar ik sāhil

soch meñ Duubā hai maujoñ kī kahānī sun kar

tum ne to sirf bahāroñ meñ unheñ dekhā hai

tum bikhar jāoge phūloñ kī kahānī sun kar

saare kirdār siyāne the magar jhūTe the

log hairān the bachchoñ kī kahānī sun kar

kitnā āsān thā bachpan meñ sulānā ham ko

niiñd aa jaatī thī pariyoñ kī kahānī sun kar

un ko mā'lūm thā chehroñ kī haqīqat kyā hai

chup rahe aa.ine chehroñ kī kahānī sun kar

phir wo be-samt uDanon ki kahani sun kar

so gaya peD parindon ki kahani sun kar

kya yahi KHwab ki ta'bir hua karti hai

uD gai nind bhi aankhon ki kahani sun kar

aable aise kabhi phuT ke na roe the

jis tarah roe hain kanTon ki kahani sun kar

hum wo sahra ke musafir hain abhi tak jin ki

pyas bujhti hai sarabon ki kahani sun kar

dard ki had se guzar kar to yahi hona tha

aankh pathra gai ashkon ki kahani sun kar

kashtiyan lauT to aai hain magar ek sahil

soch mein Duba hai maujon ki kahani sun kar

tum ne to sirf bahaaron mein unhen dekha hai

tum bikhar jaoge phulon ki kahani sun kar

sare kirdar siyane the magar jhuTe the

log hairan the bachchon ki kahani sun kar

kitna aasan tha bachpan mein sulana hum ko

nind aa jati thi pariyon ki kahani sun kar

un ko ma'lum tha chehron ki haqiqat kya hai

chup rahe aaine chehron ki kahani sun kar