phira kisi ka ilahi kisi se yar na ho

phirā kisī kā ilāhī kisī se yaar na ho

koī jahān meñ bargashta-e-rozgār na ho

ham us kī chashm-e-siyah-mast ke haiñ mastāne

ye vo nashe haiñ ki jis kā kabhī utaar na ho

jahān meñ koī kahtā nahīñ ḳhudā-lagtī

vo kyā kare jise dil par bhī iḳhtiyār na ho

na phāḌe dāman-e-sahrā ko kyuuñ ki dast-e-junūñ

rahā jab apne garebāñ meñ ek taar na ho

na khel jaan par apnī tū ai dil-e-nādāñ

ḳhudā ko yaad kar itnā tū be-qarār na ho

na bhuul zohd pe lazzat se baḳhshish-e-haq kī

vo be-nasīb hai jab tak gunāhgār na ho

tumhāre sar kī qasam khā ke dard dil kā kahūñ

jo mere likhne kā yuuñ tum ko e'tibār na ho

janāb-e-shaiḳh jī sāhib maiñ ek arz karūñ

agar mizāj-e-muqaddas pe nāgavār na ho

janāb rindoñ se milte to haiñ pe Dar hai mujhe

ki dushmanoñ kā kisī din vahāñ achār na ho

bahut hai ḳhema-e-gardūñ ke phūñkne ko to 'aish'

is āh-e-tufta jigar meñ asar hazār na ho

phira kisi ka ilahi kisi se yar na ho

koi jahan mein bargashta-e-rozgar na ho

hum us ki chashm-e-siyah-mast ke hain mastane

ye wo nashe hain ki jis ka kabhi utar na ho

jahan mein koi kahta nahin KHuda-lagti

wo kya kare jise dil par bhi iKHtiyar na ho

na phaDe daman-e-sahra ko kyun ki dast-e-junun

raha jab apne gareban mein ek tar na ho

na khel jaan par apni tu ai dil-e-nadan

KHuda ko yaad kar itna tu be-qarar na ho

na bhul zohd pe lazzat se baKHshish-e-haq ki

wo be-nasib hai jab tak gunahgar na ho

tumhaare sar ki qasam kha ke dard dil ka kahun

jo mere likhne ka yun tum ko e'tibar na ho

janab-e-shaiKH ji sahib main ek arz karun

agar mizaj-e-muqaddas pe nagawar na ho

janab rindon se milte to hain pe Dar hai mujhe

ki dushmanon ka kisi din wahan achaar na ho

bahut hai KHema-e-gardun ke phunkne ko to 'aish'

is aah-e-tufta jigar mein asar hazar na ho