phiri si dekhta hun is chaman ki kuchh hawa bulbul

phirī sī dekhtā huuñ is chaman kī kuchh havā bulbul

tujhe fursat hai jab tak āshiyāñ yaañ se uThā bulbul

tū āshiq hai vafā terā hunar hai ishq meñ varna

mirā gul be-vafā hai kyā ise qadr-e-vafā bulbul

dar-e-rahmat ḳhudā kā baaz hai dil apnā taaza rakh

qafas meñ hasrat-e-gul se mat itnā phaḌphaḌā bulbul

tujhe ai bāġhbāñ ik musht-e-par se kyā adāvat hai

bahār āḳhir hai do din meñ kujā gul phir kujā bulbul

ḳhizān-e-shūm ye gulshan ke haq meñ kyā qayāmat hai

ki is ke aate hī be-barg ho gul be-navā bulbul

dil āsūda na paayā kyā ḳhizāñ aur kyā bahār is ko

mohabbat meñ rakhe hai turfa dard-e-be-davā bulbul

bharā hai ne.amat-e-alvāñ se gul kā ḳhvān go 'hasrat'

kare har sub.h uTh kar ḳhūn-e-dil se nāshtā bulbul

phiri si dekhta hun is chaman ki kuchh hawa bulbul

tujhe fursat hai jab tak aashiyan yan se uTha bulbul

tu aashiq hai wafa tera hunar hai ishq mein warna

mera gul be-wafa hai kya ise qadr-e-wafa bulbul

dar-e-rahmat KHuda ka baz hai dil apna taza rakh

qafas mein hasrat-e-gul se mat itna phaDphaDa bulbul

tujhe ai baghban ek musht-e-par se kya adawat hai

bahaar aaKHir hai do din mein kuja gul phir kuja bulbul

KHizan-e-shum ye gulshan ke haq mein kya qayamat hai

ki is ke aate hi be-barg ho gul be-nawa bulbul

dil aasuda na paya kya KHizan aur kya bahaar is ko

mohabbat mein rakhe hai turfa dard-e-be-dawa bulbul

bhara hai neamat-e-alwan se gul ka KHwan go 'hasrat'

kare har subh uTh kar KHun-e-dil se nashta bulbul