phirta hun main ghaTi ghaTi sahra sahra tanha tanha

phirtā huuñ maiñ ghāTī ghāTī sahrā sahrā tanhā tanhā

bādal kā āvāra TukḌā khoyā khoyā tanhā tanhā

pachchhim des ke farzānoñ ne nisf jahāñ se shahr basā.e

in meñ piir buzurg arastū baiThā rahtā tanhā tanhā

kitnā bhīḌ-bhaḌakkā jag meñ kitnā shor-sharāba lekin

bastī bastī kūcha kūcha chappā chappā tanhā tanhā

sair karo bātin meñ us ke kaisā kaisā kumbh lagā hai

taak rahā hai duur ufuq ko jo bechārā tanhā tanhā

sair tamāshā rukne vaale sayyāho ye bhī sochā hai

ghaḌiyāñ ghar ko Dhālne vaalā ḳhud hai kitnā tanhā tanhā

koī na us kā maal ḳharīde koī na us kī jānib dekhe

ab banjāra ghuum rahā hai qarya qarya tanhā tanhā

dhuum machī hai chhūT rahe haiñ shahr meñ rañgoñ ke favvāre

biich meñ ik qasbātī laḌkā sahmā sahmā tanhā tanhā

dhartī aur ambar par donoñ kyā ra.anā.ī baañT rahe the

phuul khilā thā tanhā tanhā chāñd ugā thā tanhā tanhā

phirta hun main ghaTi ghaTi sahra sahra tanha tanha

baadal ka aawara TukDa khoya khoya tanha tanha

pachchhim des ke farzanon ne nisf jahan se shahr basae

in mein pir buzurg arastu baiTha rahta tanha tanha

kitna bhiD-bhaDakka jag mein kitna shor-sharaba lekin

basti basti kucha kucha chappa chappa tanha tanha

sair karo baatin mein us ke kaisa kaisa kumbh laga hai

tak raha hai dur ufuq ko jo bechaara tanha tanha

sair tamasha rukne wale sayyaho ye bhi socha hai

ghaDiyan ghar ko Dhaalne wala KHud hai kitna tanha tanha

koi na us ka mal KHaride koi na us ki jaanib dekhe

ab banjara ghum raha hai qarya qarya tanha tanha

dhum machi hai chhuT rahe hain shahr mein rangon ke fawware

bich mein ek qasbaati laDka sahma sahma tanha tanha

dharti aur ambar par donon kya ranai banT rahe the

phul khila tha tanha tanha chand uga tha tanha tanha