phul apne wasf sunte hain us KHush-nasib se

phuul apne vasf sunte haiñ us ḳhush-nasīb se

kyā phuul jhaḌte haiñ dahan-e-andalīb se

afshāñ tirī jabīñ kī hamārī nazar meñ hai

ham dekhte haiñ arsh ke taare qarīb se

tanhā lahad meñ huuñ to dabāte haiñ ye mujhe

kyā kyā ulajh rahe haiñ malak mujh ġharīb se

ka.abe meñ un kā nuur madīne meñ hai zuhūr

ābād donoñ ghar haiñ ḳhudā ke habīb se

yārab burā ho dil kī taḌap kā ki bazm meñ

baiThe vo duur uTh ke hamāre qarīb se

mar jā.ūñ maiñ to jaao mubārak ho jān-e-man

allāh se mujhe tumheñ milnā raqīb se

pahlū-tahī jo kartī hai milne meñ merī nabz

kahte haiñ ye sharīr milī hai tabīb se

mamnūn huuñ maiñ hazrat-e-'naushād' kā 'vasīm'

milte haiñ kyā ba-lutf huzūr is ġharīb se

phul apne wasf sunte hain us KHush-nasib se

kya phul jhaDte hain dahan-e-andalib se

afshan teri jabin ki hamari nazar mein hai

hum dekhte hain arsh ke tare qarib se

tanha lahad mein hun to dabaate hain ye mujhe

kya kya ulajh rahe hain malak mujh gharib se

kabe mein un ka nur madine mein hai zuhur

aabaad donon ghar hain KHuda ke habib se

yarab bura ho dil ki taDap ka ki bazm mein

baiThe wo dur uTh ke hamare qarib se

mar jaun main to jao mubarak ho jaan-e-man

allah se mujhe tumhein milna raqib se

pahlu-tahi jo karti hai milne mein meri nabz

kahte hain ye sharir mili hai tabib se

mamnun hun main hazrat-e-'naushad' ka 'wasim'

milte hain kya ba-lutf huzur is gharib se