phul se logon ko miTTi mein mila kar aaegi

phuul se logoñ ko miTTī meñ milā kar aa.egī

chal rahī hai jo havā sab kuchh fanā kar jā.egī

zindagī guzregī mujh ko rauñd kar pairoñ tale

maut lekin mujh ko siine se lagā kar jā.egī

vo kisī kī yaad meñ jaltī huī sham-e-firāq

ḳhud bhī pighlegī mirī āñkhoñ ko bhī pighlā.egī

aane vaale mausamoñ kī sar-phirī pāgal huā

ek din terī judā.ī ke tarāne gā.egī

aane vaalā vaqt bhī ro.egā mere vāste

aane vaale mausamoñ ko yaad merī aa.egī

ai mire sāthī ye tere chhoḌ jaane kī kasak

mujh ko dīmak kī tarah andar hī andar khā.egī

ye husūl-e-zar kī ḳhvāhish ek la.anat kī tarah

āḳhir ik din tujh ko apnoñ se judā kar jā.egī

zindagī ik bad-chalan āvāra laḌkī hai 'sarosh'

dekh lenā ek din ye bhī tujhe Thukrā.egī

phul se logon ko miTTi mein mila kar aaegi

chal rahi hai jo hawa sab kuchh fana kar jaegi

zindagi guzregi mujh ko raund kar pairon tale

maut lekin mujh ko sine se laga kar jaegi

wo kisi ki yaad mein jalti hui sham-e-firaq

KHud bhi pighlegi meri aankhon ko bhi pighlaegi

aane wale mausamon ki sar-phiri pagal hua

ek din teri judai ke tarane gaegi

aane wala waqt bhi roega mere waste

aane wale mausamon ko yaad meri aaegi

ai mere sathi ye tere chhoD jaane ki kasak

mujh ko dimak ki tarah andar hi andar khaegi

ye husul-e-zar ki KHwahish ek lanat ki tarah

aaKHir ek din tujh ko apnon se juda kar jaegi

zindagi ek bad-chalan aawara laDki hai 'sarosh'

dekh lena ek din ye bhi tujhe Thukraegi