phulon ke des chand sitaron ke shahr mein

phūloñ ke des chāñd sitāroñ ke shahr meñ

barbād ho rahā huuñ nigāroñ ke shahr meñ

mauj-e-saman meñ zahr hai bād-e-sabā meñ aag

dam ghuT rahā hai yāsmīñ-zāroñ ke shahr meñ

aañsū huuñ hañs rahā huuñ shagūfoñ ke darmiyāñ

shabnam huuñ jal rahā huuñ sharāroñ ke shahr meñ

vo maiñ huuñ jis ne shola-e-sāġhar uchhāl kar

kī hai ḳhizāñ kī baat bahāroñ ke shahr meñ

ye qil.a aur ye masjid-e-shāh-e-jahāñ kā auj

kis darja sar-nigūñ huuñ manāroñ ke shahr meñ

ai merī fitrat-e-tarab-āgīñ ḳhatā-muāf

sharminda huuñ maiñ zulm ke māroñ ke shahr meñ

bas maiñ banūñgā ḳhusrav-e-mahtāb ai 'salām'

sochā hai ye dhueñ ke ġhubāroñ ke shahr meñ

phulon ke des chand sitaron ke shahr mein

barbaad ho raha hun nigaron ke shahr mein

mauj-e-saman mein zahr hai baad-e-saba mein aag

dam ghuT raha hai yasmin-zaron ke shahr mein

aansu hun hans raha hun shagufon ke darmiyan

shabnam hun jal raha hun shararon ke shahr mein

wo main hun jis ne shola-e-saghar uchhaal kar

ki hai KHizan ki baat bahaaron ke shahr mein

ye qila aur ye masjid-e-shah-e-jahan ka auj

kis darja sar-nigun hun manaron ke shahr mein

ai meri fitrat-e-tarab-agin KHata-muaf

sharminda hun main zulm ke maron ke shahr mein

bas main banunga KHusraw-e-mahtab ai 'salam'

socha hai ye dhuen ke ghubaron ke shahr mein