pichhli shab KHwab mohabbat ka dikhaya gaya tha

pichhlī shab ḳhvāb mohabbat kā dikhāyā gayā thā

sub.h maiñ peḌ se laTkā huā paayā gayā thā

un pe zāhir thā mirā ishq-e-husainī tabhī to

tapte sahrā meñ mujhe dhoke se laayā gayā thā

ek bahre ko sunāyā gayā farmān-e-tarab

ek andhe ko ishāre se bulāyā gayā thā

us hathelī pe ugaa.e ga.e zaḳhmoñ ke gulāb

jis hathelī pe nayā ḳhvāb sajāyā gayā thā

pahle sūraj kiyā kartā thā zamīñ kī gardish

phir zamīñ ko bhī usī tarah ghumāyā gayā thā

dekhne vaalā thā manzar vo khulī āñkhoñ se

jab maiñ zanjīr-ba-kaf shahr meñ laayā gayā thā

pichhli shab KHwab mohabbat ka dikhaya gaya tha

subh main peD se laTka hua paya gaya tha

un pe zahir tha mera ishq-e-husaini tabhi to

tapte sahra mein mujhe dhoke se laya gaya tha

ek bahre ko sunaya gaya farman-e-tarab

ek andhe ko ishaare se bulaya gaya tha

us hatheli pe ugae gae zaKHmon ke gulab

jis hatheli pe naya KHwab sajaya gaya tha

pahle suraj kiya karta tha zamin ki gardish

phir zamin ko bhi usi tarah ghumaya gaya tha

dekhne wala tha manzar wo khuli aankhon se

jab main zanjir-ba-kaf shahr mein laya gaya tha